IPL 2023: 'அடிச்சு சொல்றேன்'...16ஆவது சீசனில் இந்த அணிதான் கோப்பை வெல்லும்: ரவி சாஸ்திரி பளிச்!

ஐபிஎல் 16ஆவது சீசன் தற்போது விறுவிறுப்பான கட்டத்தை எட்டியுள்ளது. இதில் குஜராத் டைடன்ஸ், ராஜஸ்தான் ராயல்ஸ், லக்னோ சூப்பர் ஜெய்ண்ட்ஸ், சென்னை சூப்பர் கிங்ஸ் ஆகிய அணிகள் தொடர்ந்து அதிரடியாக செயல்பட்டு புள்ளிப் பட்டியலில் ஆதிக்கம் செலுத்த ஆரம்பித்தன.

இந்நிலையில், கடைசி நேரத்தில் ராஜஸ்தான் ராயல்ஸ், சிஎஸ்கே போன்ற அணிகள் அடுத்தடுத்து தோல்விகளை சந்தித்த நிலையில், ஆரம்ப கட்டத்தில் தோல்விகளை சந்தித்த மும்பை இந்தியன்ஸ், ஆர்சிபி போன்ற அணிகள் தற்போது தொடர்ந்து வெற்றிகளை பெற்று அசத்தி வருகிறது. இதனால், புள்ளிப் பட்டியலில் அதிரடி திருப்பங்கள் ஏற்பட்டு வருகிறது.

முதல் 3 இடங்கள்:

குஜராத் அணி 10 போட்டிகளில் 7 வெற்றிகளுட்டன் முதலிடத்திலும், லக்னோ மற்றும் சிஎஸ்கே அணிகள் 10 போட்டிகளில் 11 புள்ளிகளுடன் 2, 3 ஆகிய இடங்களில் உள்ளன.

கடைசி 7 இடங்கள்:

இதனைத் தொடர்ந்து ராஜஸ்தான், ஆர்சிபி, மும்பை, பஞ்சாப் கிங்ஸ் ஆகிய அணிகள் 10 புள்ளிகளுடன் 4, 5, 6, 7 ஆகிய இடங்களில் உள்ளன. கொல்கத்தா அணி 8 புள்ளிகளுடன், சன் ரைசர்ஸ் மற்றும் டெல்லி ஆகிய அணிகள் தலா 6 புள்ளிகளுடன் கடைசி இரண்டு இடங்களில் இருக்கின்றன. இதனால், அனைத்து அணிகளுக்கும் கிட்டதட்ட கோப்பை வெல்லும் வாய்ப்பு இருப்பதாகவே கருதப்படுகிறது.

ரவி சாஸ்திரி பேட்டி:

இந்நிலையில், 16ஆவது சீசனில் எந்த அணி கோப்பை வெல்லும் என்பது குறித்து ரவி சாஸ்திரி பேசியுள்ளார். அதில், ''இப்போதைய பார்ம், தரத்தை வைத்து பார்த்தால், குஜராத் டைடன்ஸ் அணிதான் கோப்பை வெல்லும் என நினைக்கிறேன். குஜராத் அணி தொடர்ந்து சீரான ஆட்டத்தை வெளிப்படுத்தி வருகிறது. எந்த குறிப்பிட்ட வீரரையும் சார்ந்து அந்த அணி இருக்கவில்லை. 7-8 வீரர்கள் வரை சிறப்பாக விளையாடி வருகின்றனர். ஆகையால், குஜராத் அணிதான் இம்முறை கோப்பை வெல்லும்'' எனக் கூறினார்.

கடந்த சீசனிலும் குஜராத் டைடன்ஸ் அணிதான் கோப்பை வென்றது என்பது குறிப்பிடத்தக்கது.