CSK: 'தோனி கேப்டன்ஸியில்'...விளையாட விரும்புறேன்: ரஹானே போன்ற வீரர் விருப்பம்...ரசிகர்கள் ஹேப்பி!

ஐபிஎல் 16ஆவது சீசனோடு சென்னை சூப்பர் கிங்ஸ் அணிக் கேப்டன் மகேந்திரசிங் தோனி ஓய்வினை அறிவிப்பார் எனக் கூறப்பட்டு வந்த நிலையில், இதுகுறித்து சமீபத்தில் அவரிமே கேள்வி கேட்கப்பட்டது.

இதற்கு பதிலளித்த தோனி, ''கடைசி சீசனில் விளையாடுவதாக, நீங்கள்தான் சொல்கிறீர்கள், இதுவரை நான் அப்படி சொல்லவே இல்லை'' எனக் கூறினார். இதன்மூலம், தோனி அடுத்த சீசனில் விளையாடுவது கிட்டதட்ட உறுதியாகிவிட்டதாக, ரசிகர்கள் உற்சாகத்தில் இருக்கிறார்கள். மேலும், களத்தில் தோனி செய்யும் அற்புதங்களை காண ரசிகர்கள் குவிந்து வருகிறார்கள்.


அதேபோல், கடைசி ஓவரில் தோனி அடிக்கும் மெகா சிக்ஸர்கள், சிஎஸ்கே ரசிகர்கள் மத்தியில் குஷியை ஏற்படுத்தியுள்ளது. தோனி தோனி என அரங்கத்தையே ரசிகர்கள் அதிர வைத்து வருகிறார்கள்.

ஜோ ரூட் பேட்டி:

இந்நிலையில், சர்வதேச கிரிக்கெட் வீரர்கள் பலரும் தோனியின் கேப்டன்ஸிக்கு கீழ் விளையாட ஆர்வம் தெரிவித்து வருகிறார்கள். எப்பேர்ப்பட்ட வீரரும் தோனியின் கேப்டன்ஸியை விரும்பி ஏற்க தயாராக இருக்கிறார்கள். அந்த வகையில், இங்கிலாந்து அணியின் முன்னாள் கேப்டன் ஜோ ரூட்டும், தோனியின் கேப்டன்ஸியின் கீழ் விளையாட ஆர்வம் தெரிவித்துள்ளார்.

ராஜஸ்தான் நிர்வாகம் ட்வீட்:

ஜோ ரூட் தற்போது ஐபிஎலில் ராஜஸ்தான் ராயல்ஸ் அணியில் இடம்பெற்றுள்ளார். இவர், ராஜஸ்தான் ராயல்ஸின் இளம் வீரர்கள் துருவ் ஜுரெல், தேவ்தத் படிக்கல் ஆகியோரை சமீபத்தில் ராஜஸ்தான் ராயல்ஸ் நிர்வாகம் பேட்டியெடுத்தது. அப்போது, யார் கேப்டன்ஸியின் கீழ் விளையாட விரும்புகிறீர்கள் எனக் கேள்வி கேட்கப்பட்டு, தோனி மற்றும் கோலியின் பெயர்களை ஆப்ஷன்களாக வழங்கினர். அப்போது மூவரும் தோனியின் கேப்டன்ஸியைத் தான் தேர்வு செய்தனர். இதனை ராஜஸ்தான் நிர்வாகம் தனது ட்விட்டர் பக்கத்தில் பதிவிட்டுள்ளது.

இதனைத் தொடர்ந்து ரூட் சிஎஸ்கேவுக்கு வரவேண்டும், ரஹானேவைப் போல எதிர்பார்க்காத அதிரடியை தரவேண்டும் என சிஎஸ்கே ரசிகர்கள் கோரிக்கை வைத்து வருகிறார்கள்.