‘தோனி கேப்டன் பதவியை இழக்க வாய்ப்பு’: கம்பீர் அதிர்ச்சி தகவல்!

சென்னை சூப்பர் கிங்ஸ் அணிக் கேப்டன் மகேந்திரசிங் தோனி தொடர்ந்து 7ஆவது இடத்தில் களமிறங்கினால், அணியை சிறப்பாக வழிநடத்த முடியாது. கேப்டன் பதவியை இழக்க நேரிடும் என முன்னாள் வீரர் கவுதம் கம்பீர் பேசியுள்ளார்.

ஐபிஎல் 14ஆவது சீசனில் சென்னை சூப்பர் கிங்ஸ் அணி தனது முதல் லீக் போட்டியில் டெல்லி கேபிடல்ஸ் அணியை எதிர்த்து விளையாடியது. இப்போட்டியில் 7ஆவது இடத்தில் களமிறங்கிய சிஎஸ்கே கேப்டன் மகேந்திரசிங் தோனி இரண்டு பந்துகளை எதிர்கொண்டு ஆவேஷ் கான் வேகத்தில் டக்-அவுட் ஆனார்.

அடுத்து சென்னை சூப்பர் கிங்ஸ் அணி தனது இரண்டாவது லீக் போட்டியில் பஞ்சாப் கிங்ஸ் அணியை எதிர்கொள்ளவுள்ளது. இப்போட்டி துவங்குவதற்கு முன்பு பத்திரிகை ஒன்றுக்குப் பேட்டிகொடுத்துள்ள முன்னாள் வீரர் கவுதம் கம்பீர், தோனிக்கு சில அறிவுரைகளை வழங்கும் வகையில் பேசினார்.

“தோனி 7ஆவது இடத்தில் களமிறங்கினால், அணியை வழிநடத்துவது கடினம். தொடர்ந்து இதே இடத்தில் களமிறங்கினால் அவரால் சிறப்பாக விளையாட முடியாது, கேப்டன் பதவி பறிபோகவும் வாய்ப்புள்ளது. இதனால், தோனி 4 அல்லது 5ஆவது இடத்தில் களமிறங்க வேண்டும். கேப்டனாக இருப்பவர் அணியை முன்னின்று வழிநடத்தினால்தான் சிறப்பாக இருக்கும். சக அணி வீரர்களுக்கும் புத்துணர்ச்சியை தரும். தோனியை மட்டும் குறிப்பிட்டுச் சொல்ல விரும்பவில்லை. அனைத்து அணிக் கேப்டன்களும் கடைசி வரிசையில் களமிறங்காமல், நடுவரிசையிலாவது களமிறங்க வேண்டும்” என்றார்.

எதற்காக இப்படி கூறுகிறீர்கள் எனக் கேட்டபோது, “நீங்கள் 7ஆவது இடத்தில் களமிறங்கும்போது, அனைத்து பேட்ஸ்மேன்களும் ஆட்டமிழந்து பௌலர்கள் மட்டுமே எஞ்சியிருப்பார்கள். அப்போது களமிறங்கி எப்படி அதிரடியாக விளையாட முடியும்? மறுமுனையில் பேட் செய்பவர்கள் விரைந்து ஆட்டமிழந்துவிட அதிக வாய்ப்பிருக்கிறது. இதற்காகத்தான் கேப்டன்கள் நடுவரிசையிலாவது களமிறங்க வேண்டும் எனத் தொடர்ந்து கூறி வருகிறேன்” எனத் தெரிவித்தார்.

“தோனி 5 ஆண்டுகளுக்கு முன்பு அதிரடியாக விளையாடினார். தற்போது அவரது ஆட்டத்தில் தொய்வு இருப்பதைப் பார்க்கமுடிகிறது. தோனியால் பந்தைச் சரியாக கணித்து ஆட முடியவில்லை. முதலில் தோனி தன்னை நிலைப்படுத்திக்கொண்டு, அடுத்து அதிரடியாக விளையாட வேண்டும். இன்று இரண்டாவது லீக் போட்டி நடைபெறவுள்ளது. இதில் தோனி 5ஆவது இடத்தில் களமிறங்குவார் என நம்புகிறேன்” என்றார்.