CSK: 'தோனிக்கு காயம்'...மற்றொரு ஸ்டார் வீரரும் 2 வாரங்கள் விளையாட மாட்டார்: பிளெமிங் அதிர்ச்சி தகவல்!

ஐபிஎல் 16ஆவது சீசனில் சென்னை சூப்பர் கிங்ஸ் அணி, சிறப்பாக செயல்பட்டு வருகிறது. குஜராத் டைடன்ஸ், ராஜஸ்தான் ராயல்ஸ் அணிக்கு எதிராக தோல்வியை சந்தித்துள்ள சிஎஸ்கே, லக்னோ மற்றும் மும்பை இந்தியன்ஸ் ஆகிய அணிகளுக்கு எதிராக வெற்றியைப் பெற்று தற்போது 4ஆவது இடத்தில் இருக்கிறது.

காயம், பெரிய பின்னடைவு:

இந்நிலையில், சென்னை சூப்பர் கிங்ஸ் அணியில் இருந்து காயம் காரணமாக அடுத்தடுத்து வீரர்கள் விலகி வருவது பெரும் அதிர்ச்சியை ஏற்படுத்தியுள்ளது. முதலில் முகேஷ் சௌத்ரி, இதனைத் தொடர்ந்து தீபக் சஹார், பென் ஸ்டோக்ஸ் ஆகிய ஸ்டார் வீரர்கள் காயம் காரணமாக சில போட்டிகளில் விளையாட மாட்டார்கள் என தகவல் வெளியாகியிருந்தது.

தோனிக்கு காயம்:

இந்நிலையில் தற்போது, கேப்டன் மகேந்திரசிங் தோனிக்கு கால் முட்டியில் காயம் ஏற்பட்டுள்ளது. இதனை, தலைமை பயிற்சியாளர் ஸ்டீபற் பிளெமிங் அதிகாரப்பூர்வமாக அறிவித்துள்ளார். இதுகுறித்துப் பேசிய அவர், ''தோனி தற்போது சிறப்பாக விளையாடி வருகிறார். பழைய பார்மை மீட்டெடுக்க அவர் கடுமையாக பயிற்சி மேட்கொண்டு வருகிறார். தற்போது அவருக்கு கால் முட்டி பகுதியில் காயம் ஏற்பட்டுள்ளது. இதனால்தான், களத்தில் அவரால் வேகமாக ஓட முடியவில்லை'' எனக் கூறினார்.

மேலும் பேசிய அவர், ''தோனி இந்த காயத்தை பெரியதாக எடுத்துக்கொள்ளவில்லை. அது பெரிய காயமும் இல்லை. அதனால்தான், அதனை பொருட்படுத்தாமல் விளையாடுகிறார். அவர், கடந்த சில மாதங்களாகவே ஐஎபிஎலுக்காக பயிற்சியில் ஈடுபட்டு வந்தார். அவர், இந்த சீசனில் அனைத்து போட்டிகளிலும் விளையாடியே ஆக வேண்டும் என்ற மன உறுதியில் இருக்கிறார்'' எனத் தெரிவித்தார்.

மகாலா விலகல்:

தொடர்ந்து பேசிய பிளெமிங், ''மகாலா பீல்டிங் செய்தபோது கீழே விழுந்ததில் காயம் ஏற்பட்டுள்ளது. அவர் அடுத்த இரண்டு வாரத்திற்கு விளையாட மாட்டார். அதன்பிறகு விளையாடுவாரா என்பதை உறுதியாக சொல்ல முடியாது'' என்றார்.