சென்னை அணியில் குட்டி விராட் கோலி: டூ பிளஸி ஓபன் டாக்!

ருதுராஜ் கெய்க்வாட் பெங்களூர், கொல்கத்தா அணிக்கு எதிராக அடுத்தடுத்து அரை சதங்களைக் கடந்த நிலையில், தொடர்ச்சியாக கிங்ஸ் லெவன் பஞ்சாப் அணிக்கு எதிரான போட்டியிலும் ஒரு சிக்ஸர், 4 பவுண்டரிகளுடன் அரை சதம் கடந்து சென்னை அணிக்கு வெற்றியைத் தேடித்தந்தார். இவரது செயல்பாடுகள் குறித்து போட்டி முடிந்தபிறகு பேசிய ஃபாஃப் டூ பிளஸி, இளம் விராட் கோலியை ருதுராஜ் வடிவத்தில் பார்த்தேன் எனக் கூறினார்.

“ருதுராஜ் கெய்க்வாட், இளம் விராட் கோலி போல் செயல்பட்டார். அவரது ஆட்டத்தின் மூலம் இதை உணர்ந்தேன். அழுத்தங்களைக் கண்டு அஞ்சாமல் சிறப்பாக விளையாடினார். இளம் வீரரிடம் இதைப் பார்ப்பது அரிது. அவருக்கு சிறந்த எதிர்காலம் உள்ளது” எனத் தெரிவித்தார். ருதுராஜ் கெய்க்வாட் இந்த சீசனின் துவக்கத்தில் ரன்களைக் குவிக்கத் திணறி, முதல் மூன்று போட்டிகளில் இரண்டு முறை ரன்கள் எதுவும் எடுக்காமல் ஆட்டமிழந்தார். ஆனால், கடைசி மூன்று போட்டிகளில் தொடர்ச்சியாக அரைசதம் கடந்து அதிரடி காட்டினார்.

ருதுராஜ் இந்த சீசனில் செயல்பட்ட விதம் குறித்து மகேந்திரசிங் தோனியும் பேசினார். “ருதுராஜ் கெய்க்வாட் சிறப்பாக விளையாடி, கொடுத்த வாய்ப்பை கெட்டியாகப் பிடித்துக்கொண்டார். இவர் துவக்கத்தில் கொரோனாவால் பாதிக்கப்பட்டு, பல சோதனைகளைக் கடந்துவந்து தனது திறமையை நிரூபித்துள்ளார். நிச்சயம் இந்த சீசனை அவர் மறக்கமாட்டார். இது போன்ற வீரர்கள் பற்றி யாரும் அவ்வளவாகப் பேசுவதில்லை. இதனால், வாய்ப்புகள் நழுவிச் சென்றுவிடுகிறது” எனத் தெரிவித்தார்.

ஐபிஎல் 2020: பிளே ஆஃப் ரேஸ் விறுவிறுப்புக்கு சி.எஸ்.கே. தான் காரணமா?

“ருதுராஜ் தான் விரும்பும் வகையில் ஷாட்களை அடித்து ஆடக்கூடியவர். சரியான திட்டமிடலுடன் பந்துகளை எதிர்கொள்ளும் திறன் பெற்றவர். முதல் சில போட்டிகளில் எதிர்பாராத விதமாக ரன் குவிக்க இயலவில்லை. இருப்பினும், இதையெல்லாம் பற்றிக் கவலைப்படாமல் தன்னுடைய திறமையை நிரூபித்துள்ளார். வருங்காலத்திலும் சிறப்பாக விளையாடுவார் என நம்புகிறேன்”என்றார்.