SRH vs RR: ‘தரமான சம்பவம்’ ராய், வில்லியம்சன் மரண பேட்டிங்: ராஜஸ்தான் ராயல்ஸ் படுதோல்வி!

ஐபிஎல் 14ஆவது சீசன் 40ஆவது லீக் போட்டியில் சன் ரைசர்ஸ் ஹைதராபாத், ராஜஸ்தான் ராயல்ஸ் அணிகள் மோதி வருகின்றன. இதில், டாஸ் வென்று முதலில் களமிறங்கிய ராஜஸ்தான் அணியில் கேப்டன் சஞ்சு சாம்சன் மிரட்டலாக விளையாடி அரை சதம் கடந்தார்.

ராஜஸ்தான் இன்னிங்ஸ்:

முதலில் களமிறங்கிய ராஜஸ்தான் அணியில் ஓபனர் எவன் லிவிஸ் 6 (4) ரன்கள் மட்டும் சேர்த்து நடையைக் கட்டினார். இதனைத் தொடர்ந்து கேப்டன் சஞ்சு சாம்சன், யாஷஸ்வி ஜெய்ஸ்வால் ஆகியோர் பார்ட்னர்ஷிப் அமைத்து ரன் மழை பொழிந்தார்கள். இதனால், ராஜஸ்தான் அணி ஸ்கோர் உயர்வில் விறுவிறுப்பு இருந்தது.

இந்நிலையில் ஜெய்ஷ்வால் 23 பந்துகளில் 36 ரன்கள் எடுத்து ஆட்டமிழந்தார். அடுத்து, லிவிங்ஸ்டனும் 4 (6) வந்த வேகத்தில் நடையைக் கட்டியதால் ஆட்டத்தில் பரபரப்பு ஏற்பட்டது. இதனைத் தொடர்ந்து சாம்சன், லம்ரோர் இருவரும் பார்ட்னர்ஷிப் அமைத்தார்கள். 15 ஓவர்கள் முடிவில் அந்த அணி 113/3 ரன்கள்தான் சேர்த்திருந்தது. இந்நிலையில் 16ஆவது ஓவரை சித்தார்த் கௌல் வீச வந்தார். அந்த ஒவரில் முதல் பந்தில் பவுண்டரி அடித்த சாம்சன் அரை சதம் எடுத்து அசத்தினார்.

தொடர்ந்து இரண்டாவது பந்தில் இரண்டு ரன்கள், மூன்றாவது பந்தில் சிக்ஸர் என சாம்சன் மிரட்டலாக விளையாடினார். அதுபோதாது என்று அதே ஓவரில் லாம்ரோரும் சிக்ஸர் விளாச அந்த 6 பந்துகளில் 20 ரன்கள் சேர்ந்தது. இதனால், ராஜஸ்தான் 16 ஓவர்கள் முடிவில் 133/3 என்ற நல்ல நிலையை எட்டியது.

அடுத்து புவனேஷ்வர் குமார் வீசிய அடுத்த ஓவரில் 10 ரன்கள்வரை கசிந்த நிலையில், தொடர்ந்து ஹோல்டர் வீசிய 18ஆவது ஓவரிலும் 10 ரன்கள் பறந்ததால், ராஜஸ்தானின் ஸ்கோர் 150 ரன்களை கடந்தது. இரண்டு ஓவர்களில் 20 ரன்கள் கசிந்த நிலையில், 19ஆவரை வீசிய புவனேஷ்வர் குமார் வெறும் 7 ரன்களை மட்டும் விட்டுக்கொடுத்து அசத்தினார். ஒரு பவுண்டரி கூட செல்லவில்லை. அடுத்து சித்தார்த் கௌல் வீசிய கடைசி ஓவரின் இரண்டாவது பந்தில் சாம்சன் 82 (57) ஆட்டமிழந்தார். மூன்றாவது பந்தில் ஒரு ரன் சென்றது. நான்காவது பந்தில் ரியான் பராக் கோல்டன் டக் ஆனார். தொடர்ந்து கடைசி இரண்டு பந்துகளில் இரண்டு ரன்கள் மட்டுமே சென்றதால், ராஜஸ்தான் அணி 20 ஓவர்கள் முடிவில் 164/5 ரன்கள் மட்டுமே சேர்த்தது. கௌல் இரண்டு விக்கெட்களை கைப்பற்றினார்.

ஹைதராபாத் இன்னிங்ஸ்:

இலக்கை துரத்திக் களமிறங்கிய ஹைதராபாத் அணியில் ஓபனர் விருத்திமான் சாஹா 11 பந்துகளில் 18 ரன்கள் எடுத்து ஆட்டமிழந்தார். இதனைத் தொடர்ந்து பிரியம் கார்க் கோல்டன் டக் ஆகி பரபரப்பை ஏற்படுத்தினார். இருப்பினும் ஜேசன் ராய் மிரட்டலாக விளையாடி 42 பந்துகளில் 60 ரன்கள் குவித்து, அசத்தினார்.

இறுதியில் கேன் வில்லியன்சன் அபிஷேக் ஷர்மா ஆகியோர் பார்ட்னர்ஷிப் அமைத்தார்கள். வில்லியம்சன் 41 பந்துகளில் 51 ரன்கள் குவித்தார். அபிஷேக்கும் தனது பங்கிற்கு 16 பந்துகளில் 21 ரன்கள் எடுத்து அசத்தினார். இதனால், ஹைதராபாத் அணி 18.3 ஓவர்களில் 167 ரன்கள் எடுத்து 7 விக்கெட்கள் வித்தியாசத்தில் அபார வெற்றிபெற்றது.