Yuvraj Singh Retirement: சிக்ஸர் நாயகன் யுவராஜ் சிங் சர்வதேச போட்டிகளிலிருந்து ஓய்வு அறிவிப்பு

இந்திய அணிக்காக பல போட்டிகளில் விளையாடிய யுவராஜ் சிங் சர்வதேச கிரிக்கெட் போட்டிகளிலிருந்து ஓய்வு பெறுவதாக இன்று அறிவித்துள்ளார்.

முன்னதாக தான் ஓய்வு பெறுவது குறித்தும், வெளிநாடுகளில் நடக்கும் உள்ளூர் கிரிக்கெட் தொடரில் பங்கேற்க உள்ளதாக அதற்கான ஆலோசனையை பிசிசிஐ.,யிடம் செய்வதாக தகவல்கள் வெளியாகின.

இந்நிலையில் தனது ஓய்வு அறிவிப்பை இன்று பத்திரிக்கையாளர்கள் முன் யுவராஜ் சிங் அறிவித்து பேசினார்.

40 டெஸ்ட், 304 ஒருநாள், 58 டி20, 132 ஐபிஎல் போட்டிகளில் விளையாடி கிரிக்கெட் ரசிகர்களுக்கு மிகப்பிடித்த வீரர்களில் ஒருவராக யுவராஜ் சிங் திகழ்ந்தார்.

யுவராஜ் சிங் பேசியதாவது:
2000ம் ஆண்டில் முதல் முறையாக ஒருநாள் தொடரில் அறிமுகமானது மறக்க முடியாது. அதன் பின்னர் 2007ல் டி20 உலகக் கோப்பையின் போது இங்கிலாந்துக்கு எதிராக ஒரே ஓவரில் 6 சிக்ஸர்கள் விளாசியது எனக்கும், ரசிகர்களுக்கும் மறக்கமுடியாத நினைவாக உள்ளது.

2011 உலகக் கோப்பை தொடரிலும், இலங்கைக்கு எதிரான இறுதிப் போட்டியில் சிறப்பாக விளையாடி 28 ஆண்டுகளுக்கு பிறகு உலகக் கோப்பையை இந்திய அணிக்காக வென்று கொடுக்க உதவியது என்னால் மறக்க முடியாத விஷயம்.

அதன் பின்னர் என் உடல் நிலை காரணமாக இந்திய அணிக்காக விளையாட முடியாதது மிகுந்த வேதனை அளித்தது. அதிலிருந்து மீண்டும் அணியில் இடம் பெற தான் போராடியது அதிகம். இருப்பினும் சரியான வகையில் போட்டியில் இடம் கிடைக்கவில்லை, சரியாகவும் விளையாட முடியவில்லை.

இந்த தருணத்தில் எனக்கு வாய்ப்பளித்த தேர்வுக்குழு உறுப்பினர்களாக இருந்த சந்து போடே, டி.ஏ சேகர் ஆகியோருக்கு நன்றி.

எனது மிக நெருங்கிய நண்பர்களான கம்பீர், ஜகீர்கான், சேவாக் ஆகியோருக்கு நன்றி தெரிவிப்பதோடு,என்னோடு விளையாடிய அனைத்து வீரர்களுக்கும் எனது மனமார்ந்த நன்றியை தெரிவித்துக் கொள்கிறேன்.

எனக்கு வாய்ப்பளித்த ஐபிஎல் உரிமையாளர்களுக்கு நன்றி தெரிவிக்கும் அதே சமயம் கடைசியாக, என்னை உலகிற்கு காட்டிய தன்னை குறித்து செய்திகள் வெளியிட்ட பத்திரிக்கையாளர்களுக்கும், ஊடகங்களுக்கும் மிகுந்த நன்றியை தெரிவித்துக் கொள்கின்றேன் என தெரிவித்துள்ளார்.