டெஸ்ட் கிரிக்கெட்டை பொறுத்தவரை அதிக பந்துகளை வீணடித்து ரன்களை சேர்ப்பதுதான் வழக்கம். இப்பேர்ப்பட்ட டெஸ்டிலும் சிலர் காட்டடி அடித்து அரை சதம் எடுத்திருக்கிறார்கள். அவர்களின் டாப் 3 பேட்ஸ்மேன்கள் குறித்து தற்போது பார்ப்போம்.
3.விரேந்தர் சேவாக் (32 பந்துகளில்)
இந்த போட்டியாக இருந்தாலும், முதல் பந்தில் பவுண்டரி அடிப்பதை வழக்கமாகக் கொண்டவர்தான் இந்திய அணி ஓபனர் விரேந்தர் சேவாக். 2008-ல் இங்கிலாந்துக்கு எதிரான டெஸ்டில் 32 பந்துகளில் அரை சதம் அடித்து கெத்து காட்டினார். சென்னையில் நடைபெற்ற அப்போட்டியில் இவர் மொத்தம் 68 பந்துகளை எதிர்கொண்டு 83 ரன்கள் அடித்தார். 32 பந்துகளில் அரை சதம் அடித்து, டெஸ்டில் அதிவேகமாக அரை சதம் அடித்த இந்திய வீரர்கள் பட்டியலில் 3ஆவது இடத்தைப் பிடித்துள்ளார்.
2.ஷர்தூல் தாகூர் (31 பந்துகளில்):
இந்திய அணியின் வளர்ந்து வரும் ஆல்-ரவுண்டர் ஷர்தூல் தாகூர், பேட்டிங் மற்றும் பந்துவீச்சு இரண்டிலும் பட்டையைக் கிளப்ப கூடியவர். நடந்து முடிந்த இங்கிலாந்துக்கு எதிரான நான்காவது டெஸ்ட் முதல் இன்னிங்ஸில் 31 பந்துகளில் அரை சதம் அசத்தினார். இதன்மூலம், டெஸ்டில் இந்திய அணிக்காக அதிவேகமாக அரை சதம் அடித்த இரண்டாவது வீரராக திகழ்கிறார்.
1.கபில்தேவ் (30 பந்துகளில்)
இந்திய அணியின் முன்னாள் வீரர் கபில்தேவ், பேட்டிங் மற்றும் பந்துவீச்சு இரண்டிலும் அபாராமக விளையாடி பலமுறை இந்திய அணிக்கு வெற்றியைப் பெற்றுக்கொடுத்துள்ளார். கரச்சியில் நடைபெற்ற பாகிஸ்தானுக்கு எதிரான ஒரு டெஸ்டில் இவர் வெறும் 30 பந்தகளில் அரை சதம் அடித்து மிரட்டினார். இதன்மூலம், டெஸ்டில் இந்திய அணிக்காக அதிவேக அரை சதம் அடித்த முதல் வீரராக திகழ்கிறார்.
1982ஆம் ஆண்டில் இங்கிலாந்துக்கு எதிரான டெஸ்டில் 33 பந்துகளிலும், 1978-ல் பாகிஸ்தானுக்கு எதிரான டெஸ்டில் 33 பந்துகளிலும் கபில் தேவ் அரை சதம் அடித்திருந்தார் என்பது குறிப்பிடத்தக்கது.