மேத்யூ வேட் அதிரடி: இந்திய அணிக்கு சவாலான இலக்கு!

சிட்னியில் இன்று டாஸ் வென்ற இந்தியா பீல்டிங் தேர்வு செய்தது. ஆஸ்திரேலிய அணியில் ஆரோன் ஃபிஞ்ச், மேத்யூ வேட் துவக்க வீரர்களாகக் கமறிங்கினர். ஃபிஞ்ச் ரன் எதுவும் எடுக்காமல் தான் சந்தித்த இரண்டாவது பந்தில் வாஷிங்டன் சுந்தரிடம் வீழ்ந்தார். மறுமுனையில் மேத்யூ வேட் அதிரடியாக 53 பந்துகளில் 7 பவுண்டரி, 2 சிக்ஸர்களுடன் 80 ரன்கள் சேர்ந்து ஷர்துல் தாகூரிடம் அவுட் ஆனார். தடுமாற்றத்துடன் விளையாடிய ஸ்டீவன் ஸ்மித் தான் சந்தித்த 21ஆவது பந்தில்தான் முதல் பவுண்டரியையே அடித்டார். அவர் மொத்தம் 23 பந்துகளில் 24 ரன்கள் சேர்த்து ஆட்டமிழந்தார்.

நான்காவது வரிசையில் களமிறங்கிய கிளென் மேக்ஸ்வெல் ஆரம்பம் முதலே அதிரடி காட்டிய நிலையில், யுஷ்வேந்திர சஹல் வீசிய 13ஆவது ஓவரில் விக்கெட் கீப்பர் ராகுலிடம் கேட்ச் கொடுத்தார். ஆனால் அவர் பெவிலியன் திரும்பிய போது, மூன்றாவது நடுவரால் சஹல் வீசியது நோ-பால் என்று அறிவிக்கப்பட்டது. அதனைத் தொடர்ந்து மீண்டும் அதிரடி ஆட்டத்தைத் தொடர்ந்த கிளென் மேக்ஸ்வெல் 36 பந்துகளில் 3 பவுண்டரி, 3 சிக்ஸர்களுடன் 54 ரன்கள் சேர்த்து கடைசி ஓவரில் நடராஜனிடம் கிளீன் போல்ட் ஆனார்.

கடைசி நேரத்தில் களமிறங்கிய மோய்சஸ் ஹென்ரிக்ஸ் (5), டார்சி ஷார்ட் (7) மற்றும் டேனியல் சாம்ஸ் (4) ஓரளவுக்கு ரன் சேர்த்தனர். இதனால், ஆஸ்திரேலிய அணி 20 ஓவர்கள் முடிவில் 5 விக்கெட்களை இழந்து 186 ரன்கள் சேர்த்து, இந்திய அணிக்கு 187 ரன்களை வெற்றி இலக்காக நிர்ணயம் செய்துள்ளது. இந்திய அணியில் வாஷிங்டன் சுந்தர் சிறப்பாகப் பந்து வீசி 2 விக்கெட்களைக் கைப்பற்றினார்.