கொந்தளித்த கோரி ஆண்டர்சன்: டெல்லிக்கு அமோக வெற்றி!

புதுடெல்லி: ஐதராபாத் அணிக்கு எதிரான ஐபிஎல் தொடரின் லீக் போட்டியில் கோரி ஆண்டர்சன் கைகொடுக்க, டெல்லி அணி 6 விக்கெட் வித்தியாசத்தில் அசத்தல் வெற்றி பெற்றது.

இந்தியாவில் நடக்கும் உள்ளூர் டி-20 கிரிக்கெட் தொடரான ஐபிஎல் தொடர், 10வது ஆண்டாக வெற்றிகரமாக துவங்கி நடந்து வருகிறது. இதில் டெல்லியில் நடந்த 40வது லீக் போட்டியில், ஐதராபாத், டெல்லி அணிகள் மோதின. இதில் டாஸ் வென்ற டெல்லி அணி கேப்டன் கருண் நாய ர் முதலில் பீல்டிங் தேர்வு செய்தார்.

இதையடுத்து களமிறங்கிய ஐதராபாத் அணிக்கு துவக்க வீரர் வார்னர் (30), தவான் (28), வில்லியம்சன் (24) எல்லாம் ஓரளவு கைகொடுத்தனர். பின் வந்த யுவராஜ் சிங், அதிரடி காட்ட, ஐதராபாத் அணி, 20 ஓவரில், 3 விக்கெட்டுக்கு 185 ரன்கள் எடுத்தது.

கோரி கொந்தளிப்பு:
மந்தமான டெல்லி ஆடுகளத்தில் கடின இலக்கை துரத்திய டெல்லி அணிக்கு சாம்சன் (24), கருண் நாயர் (39) நல்ல துவக்கம் அளித்தனர். தொடர்ந்து வந்த இளம் பண்ட் (34), ஸ்ரேயாஸ் ஐயர் (33) ஓரளவு கைகொடுத்தனர்.

பின் வந்த கோரி ஆண்டர்சன், கோவமாக கொந்தளித்து, ஆக்ரோஷமான ஆட்டத்தை வெளிப்படுத்தினார். இவர் 24 பந்துகளில், 2 பவுண்டரி, 3 சிக்சர் உட்பட 41 ரன்கள் விளாச, டெல்லி அணி, 19.1 ஓவரில், 4 விக்கெட்டுக்கு, 189 ரன்கள் எடுத்து 6 விக்கெட் வித்தியாசத்தில் வெற்றி பெற்றது.