உள்ளூரில் ‘கெத்து’, வெளியூரில் ‘வெத்து’ : வார்னருக்கு வந்த சோதனை!

புனே: உள்ளூரில் மிரட்டும் ஐதராபாத் கேப்டன் டேவிட் வார்னர், வெளியூரில் ரன்கள் சேர்க்க தடுமாறி வருகிறார்.

இந்தியாவில் நடக்கும் உள்ளூர் டி-20 கிரிக்கெட் தொடரான ஐபிஎல் தொடர், 10வது ஆண்டாக வெற்றிகரமாக துவங்கி நடந்து வருகிறது. இதில் புனேவில் நடக்கும் 24வது லீக் போட்டியில், புனே, ஐதராபாத் அணிகள் மோதுகின்றன.

இதில் ’டாஸ்’ வென்ற புனே அணியின் கேப்டன் ஸ்டீவ் ஸ்மித் முதலில் ‘பீல்டிங்’ தேர்வு செய்தார். புனே அணியில் தமிழக வீரர் வாஷிங்டன் சுந்தர் வாய்ப்பு பெற்றார். ஐதராபாத் அணியில் யுவராஜ் சிங் காயம் காரணமாக நீக்கப்பட்டு பிபுல் சர்மா அணியில் இடம் பிடித்தார்.

இதையடுத்து களமிறங்கிய ஐதராபாத் அணிக்கு, வழக்கத்துக்கு மாறாக கேப்டன் டேவிட் வார்னர் ஆமைவேக ஆட்டத்தை வெளிப்படுத்தினார். இவர் மொத்தமாக 40 பந்துகளில் 43 ரன்கள் எடுத்தார். இதுவரை இந்தியாவில் நடந்த ஐபிஎல் போட்டிகளில் முதலில் பேட்டிங் செய்து 30 அல்லது அதற்கு அதிகமாக பந்துகளை சந்தித்து குறைந்த ரன்கள் சேர்த்த இன்னிங்ஸ் இதுதான்.

அதேபோல இந்த அண்டு நடக்கும் ஐபிஎல் தொடரில் வார்னர் ஐதராபாத்தில் விளையாடிய நான்கு இன்னிங்சில் 164 ரன்கள் எடுத்துள்ளார். வெளியூரில் விளையாடிய 3 இன்னிங்சில், 118 ரன்கள் மட்டுமெ எடுத்துள்ளார்.