டக்வொர்த் லீவிஸ்: 14 ரன்கள் வித்தியாசத்தில் திண்டுக்கல் டிராகன்ஸ் வெற்றி

திண்டுக்கல் என்.பி.ஆர் கல்லூரி மைதானத்தில் திண்டுக்கல் டிராகன்ஸ் அணிக்கும், மதுரை சூப்பர் ஜெயிண்ட்ஸ் அணிக்கும் இடையே நடந்த போட்டியில் டக் ஒர்த் லீவிஸ் முறைப்படி திண்டுக்கல் டிராகன்ஸ் அணி 14 ரன்கள் வித்தியாசத்தில் வெற்றி பெற்றுள்ளது.

டாஸ் வென்று முதலில் பேட்டிங் செய்த திண்டுக்கல் டிராகன்ஸ் அணியில் ஜகதீஷன் மற்றும் ஸ்ரீதர் ராஜூ தொடக்க வீரர்களாக களம் இறங்கினர். ஜகதீஷன் தவிர மற்ற வீரர்கள் சொறப ரன்களில் ஆட்டமிழக்க திண்டுக்கல் அணி 18 ஓவரில் 9 விக்கெட்டுக்கு 142 ரன்கள் எடுத்தது. ஜகதீஷ் மட்டும் நிலைத்து நின்று ஆடி 71 ரன்கள் எடுத்தார். மதுரை சூப்பர் ஜெயிண்ட்ஸ் அணி சார்பில் முருகானந்தம் 4 விக்கெட்டும், கணேஷ், சந்திரசேகர், தியாகராஜன் ஆகியோர் தலா ஒரு விக்கெட் கைப்பற்றினர்.

இதன் பின்னர் 143 ரன்களை வெற்றி இலக்காக கொண்ட மதுரை சூப்பர் ஜெயிண்ட்ஸ் அணியில் தொடக்க வீரர்களாக களம் இறங்கிய அருண் கார்த்திக், கணபதி விக்னேஷ் ஆகியோர் சொற்ப ரன்களில் ஆட்டமிழந்தனர்.

தியாகராஜன் மட்டும் நிலைத்து ஆடி 37 ரன்கள் சேர்த்தார். திண்டுக்கல் அணி சார்பில் கேதர்னாத், சஞ்சய் ஆகியோர் தலா இரு விக்கெட்டுகளும், அஸ்வின் மற்றும் சன்னி குமார் சிங் ஆகியோர் தலா ஒரு விக்கெட் கைப்பற்றினர். இதன் மூலம் நிர்ணயிக்கப்பட்ட 18 ஓவர்களில் மதுரை சூப்பர் ஜெயிண்ட்ஸ் அணி 7 விக்கெட் இழப்பிற்கு 131 ரன்கள் மட்டுமே எடுத்து 14 ரன்கள் வித்தியாசத்தில் தோல்வியடைந்தது.