பெண் கெயில்லாக உருவெடுக்கும் மேற்கிந்திய வீராங்கனை டாட்டின்

சென்னை: கிரிக்கெட் ஷாட் அடிக்கும் நேர்த்தி, ஆக்ரோஷம் என பலவற்றிலும் மேற்கிந்திய கிரிக்கெட் வீரர் கிறிஸ் கெயில்லை போலவே விளையாடும் மேற்கிந்திய கிரிக்கெட் வீராங்கனை டியாண்ட்ரா டாட்டின் தன்னை பெண் கெயில் என்று அழைக்கப்படுவதில் விருப்பம் தெரிவித்துள்ளார்.

மகளிர் டி20 போட்டியில் சதமடித்துள்ள டியாண்ட்ரா டாட்டின், 38 பந்துகளில் சதமடித்து அனைவரின் கவனைத்தையும் ஈர்த்தவர். தனது இலட்சியங்கள் குறித்து செய்தியாளர்களிடம் பகிர்ந்து கொண்ட டாட்டின் கூறுகையில், "கிறிஸ் கெயில் 50 பந்துகளில் டி20 போட்டியில் சதமடித்தார். நான் அவரை விட குறைவான பந்துகளில் சதமடித்தவுடன் கிறிஸ் கெயில் உடனடியாக என்னை பாராட்டினார்.

இது எனக்கு மிகவும் இனிமையான அனுபவமாக அமைந்தது. எனது இளம் பருவத்தில் நான் விவியன் ரிச்சர்ட்ஸ்சை தான் ஆதர்ச ரோல் மாடலாக கொண்டிருந்தேன். போட்டியின் முதல் பந்திலேயே தனது ஆக்ரோஷத்தையும், அட்டகாசமான ஷாட்களையும் கொண்டு எதிராளிகளை பந்தாடுவதில் விவியன் ரிச்சர்ட்ஸ்க்கு நிகர் விவியன் ரிச்சர்ட்ஸ் தான்.

கிரிக்கெட் மட்டுமல்லாமல் ஷாட்புட், ஈட்டி எறிதல், வட்டு எறிதல் என பல போட்டிகளிலும் நான் தங்கப்பதக்கம் வென்றுள்ளேன், நான் அடிப்படையில் ஒரு தடகள வீராங்கனை. விளையாட்டு ஒன்றே எனது கனவு, லட்சியம் ஆகும்" என்று டியாண்ட்ரா டாட்டின் தெரிவித்தார்.