எல்லா நாளுமே கிறிஸ்துமஸ் தான்...: குஷியான ஸ்டீவ் ஸ்மித்!

இங்கிலாந்தில் பாரம்பரிய ஆஷஸ் டெஸ்ட் கிரிக்கெட் தொடர் நடக்கிறது. இதன் முதல் டெஸ்ட் போட்டி பர்மிங்ஹாமில் நடக்கிறது. இதில் முதல் இன்னிங்சில் ஆஸ்திரேலிய அணி 284 ரன்கள், இங்கிலாந்து அணி 374 ரன்கள் எடுத்தன.

கடின இலக்கு:
தொடர்ந்து ஆஸ்திரேலிய அணி இரண்டாவது இன்னிங்சில் 7 விக்கெட்டுக்கு 487 ரன்கள் எடுத்து டிக்ளேர் செய்தது. இதன் மூலம் இங்கிலாந்து அணிக்கு, 398 ரன்கள் இலக்காக நிர்ணயித்தது. நான்காவது நாள் ஆட்டநேர முடிவில், இங்கிலாந்து அணி விக்கெட் இழப்பின்றி 13 ரன்கள் எடுத்தது.

ஸ்மித் அபாரம்:
இந்நிலையில் ஆஸ்திரேலிய அணி முதல் இன்னிங்சில் தடுமாறிய போது, தனி ஒருவனாக அசத்திய ஆஸ்திரேலிய வீரர் ஸ்டீவ் ஸ்மித் (144 ரன்கள்), சதம் விளாசினார். தொடர்ந்து இரண்டாவது இன்னிங்சிலும் மிரட்டிய ஸ்மித், (142 ரன்கள்) மீண்டும் சதம் அடித்து கைகொடுத்தார்.

தடைக்கு பின்...:
பந்தை சேதப்படுத்திய விவகாரத்தில் ஒரு ஆண்டு தடைக்கு பின் ஆஷஸ் தொடரில் களமிறங்கிய ஸ்மித்துக்கு இங்கிலாந்து ரசிகர்கள் மோசமான வரவேற்பு அளித்தனர். ஆனால் தடைக்கற்களை படிக்கற்களாக மாற்றி ஸ்மித் சாதித்துக்காட்டினார்.

எல்லா நாளுமே.....
இந்நிலையில் இந்த சிறப்பான ‘கம் பேக்’ குறித்து ஸ்மித், தனக்கு எல்லா நாளுமே கிறிஸ்துமஸ் போன்ற நாள் தான் என குறிப்பிட்டுள்ளார்.


இதுகுறித்து ஸ்மித் கூறுகையில், ‘என் திறமை மீது எனக்கு ஒருபோதும் சந்தேகமேயில்லை. ஆனால் இது போன்ற டெஸ்ட் கம் பேக் என்பது கனவு போன்றது. ஆஷஸ் டெஸ்ட் தொடரின் முதல் டெஸ்டிலேயே அடுத்ததடுத்த இன்னிங்சில் சதம் விளாசியது, இதற்கு முன்பாக நான் எட்டாத ஒன்று. அதனால் இந்த டெஸ்டின் எல்லா நாளுமே எனக்கு கிறிஸ்துமஸ் போல உள்ளது.’ என்றார்.