டெஸ்ட் பேட்ஸ்மேன்கள் தரவரிசை: முதல் 10 இடங்களில் 3 இந்திய வீரர்கள்..முழு விபரம் இதோ!

கிரிக்கெட் போட்டிகள் அல்லது கிரிக்கெட் தொடர் நடந்து முடிந்த பிறகு, ஐசிசி தரவரிசைப் பட்டியல் வெளியாகுவது வழக்கம். அந்த வகையில் தற்போது இந்தியா, இங்கிலாந்து இடையிலான இரண்டாவது டெஸ்ட் போட்டி முடிந்த பிறகு டெஸ்ட் பேட்ஸ்மேன்களுக்கான தரவரிசைப் பட்டியலை ஐசிசி வெளியிட்டுள்ளது.

முதல் மூன்று இடங்கள்:

தற்போது வெளியாகியுள்ள டெஸ்ட் பேட்ஸ்மேன்களுக்கான தரவரிசையில், முதல் 10 இடங்களில் 3 இந்திய வீரர்கள் இடம்பெற்றுள்ளனர். நியூசிலாந்து அணிக் கேப்டன் கேன் வில்லியம்சன் 901 புள்ளிகளுடன் முதலிடத்தைத் தக்கவைத்துள்ளார். இந்தியாவுக்கு எதிரான இரண்டாவது டெஸ்டில் 180 ரன்கள் விளாசிய ஜோ ரூட் 893 புள்ளிகளுடன் இரண்டாவது இடத்தை பிடித்துள்ளார்.

மூன்று இந்திய வீரர்கள்:

ஆஸ்திரேலிய வீரர்கள் ஸ்மித், மார்னஷ் லபுஷேன் ஆகியோர் மூன்று மற்றும் நான்காவது இடத்தில் உள்ளனர். அடுத்து 5,6,7 ஆகிய இடங்களில் இந்திய அணிக் கேப்டன் விராட் கோலி, ரோஹித் ஷர்மா, ரிஷப் பந்த் ஆகியோரின் பெயர்கள் இடம்பெற்றுள்ளன.

பாபர் அசாம்:

பாகிஸ்தான் அணிக் கேப்டன் பாபர் அசாம் தற்போது 8ஆவது இடத்தை பிடித்துள்ளார். அடுத்து, ஆஸ்திரேலிய அணியின் ஓபனர் டேவிட் வார்னர் 9ஆவது இடத்தையும், தென்னாப்பிரிக்க அணியின் குவின்டன் டி காக் 10ஆவது இடத்தையும் பிடித்துள்ளனர்.

கோலி தொடர் பின்னடைவு:

ஐசிசி டெஸ்ட் தரவரிசையில் நீண்ட காலம், முதலிடத்தில் இருந்த கோலி 2019ஆம் ஆண்டிற்குப் பிறகு ரன்களை குவிக்கத் தவறி, தரவரிசையில் பின்னடைவை சந்திக்கத் துவங்கினார். தற்போது 5ஆவது இடத்திற்கு தள்ளப்பட்டுள்ளார். இனி வரும் போட்டிகளிலும் சொதப்பும் பட்சத்தில், தரவரிசையில் மேலும் பின்னடைவை சந்திக்க நேரிடும் எனக் கருதப்படுகிறது.