‘அதுக்குள்ளேவா’…அறிவிக்கப்பட்ட சிறுதி நேரத்தில் நம்பர் 1 இடத்தை இழந்த இந்திய அணி: ஏன் தெரியுமா?

இந்தியா வந்துள்ள ஆஸ்திரேலிய அணி நான்கு போட்டிகள் கொண்ட டெஸ்ட் தொடரில் பங்கேற்று விளையாடி வருகிறது.

இதில் நாக்பூரில் துவங்கி நடைபெற்ற முதல் போட்டியில், இந்திய அணி பேட்டிங், பந்துவீச்சு இரண்டிலும் அபாரமாக செயல்பட்டு அசத்தி, இன்னிங்ஸ் வெற்றியைப் பெற்றது. இதன்மூலம், டெஸ்ட் தரவரிசையில் ஆஸ்திரேலிய அணியை பின்னுக்கு தள்ளி இந்திய அணி முதலிடத்தை பிடித்துள்ளதாக ஐசிசி அறிவித்தது.

இந்திய அணி ஏற்கனவே ஒருநாள், டி20 தரவரிசைகளிலும் முதலிடத்தில் இருப்பதால், மூன்றுவித அணிகள் தரவரிசையிலும் இந்திய அணி முதலிடத்தை பிடித்து சாதனை படைத்துள்ளது. ரசிகர்களும் இணையத்தில் மகிழ்ச்சியை வெளிப்படுத்தி வந்தார்கள்.

டெஸ்ட் தரவரிசையில்:

இந்திய அணி டெஸ்ட் தரவரிசையில் 115 புள்ளிகளுடன் முதலிடத்திலும், ஆஸ்திரேலிய அணி 111 புள்ளிகளுடன் இரண்டாவது இடத்திலும் இருக்கிறது. நியூசிலாந்து அணி 100 புள்ளிகளுடன் மூன்றாவது இடத்தில் உள்ளது என ஐசிசி தெரிவித்தது.

மீண்டும் ஆஸி முதலிடம்:

இதனைத் தொடர்ந்து, அறிவிப்பில் பிழை இருப்பதாக கூறி இந்த தவரிசைப் பட்டியலை ஐசிசி திரும்பப்பெற்றது. இந்நிலையில், புதிதாக வெளியிட்ட ஐசிசி தரவரிசைப் பட்டியலில் ஆஸ்திரேலிய அணி 126 புள்ளிகளுடம் அசைக்க முடியாத முதலிடத்தை பிடித்துள்ளது.

இந்திய அணி 115 புள்ளிகளுடன் இரண்டாவது இடத்திற்கு தள்ளப்பட்டுள்ளது. மற்ற ஒருநாள், டி20 தரவரிசைகளில் இந்தியா முதலிடத்தில் இருக்கிறது. அடுத்த மூன்று டெஸ்ட்களிலும் இந்திய அணி வெற்றியைப் பெற்றால் மட்டும்தான், முதலிடத்தை பிடிக்க முடியும்.

ரோஹித் சாதனை:

ரோஹித் ஷர்மா நாக்பூர் டெஸ்டில் சதம் விளாசியதன் மூலம், டெஸ்ட் தரவரிசையில் 10ஆவது இடத்தில் இருந்து 8ஆவது இடத்திற்கு முன்னேறியுள்ளார். டேவிட் வார்னர் 6 இடங்கள் பின்தங்கி, 20ஆவது இடத்திற்கு சென்றுள்ளார்.

அஸ்வின் சாதனை:

முதல் டெஸ்டில் அஸ்வின் அபாரமாக பந்துவீசியதன் மூலம், டெஸ்ட் தரவரிசையில் அஸ்வின் இரண்டாவது இடத்திற்கு முன்னேறியுள்ளார். பாட் கம்மின்ஸ் முதலிடத்தில் இருக்கிறார்.

டி20 பேட்டர்களில் சூர்யகுமார் யாதவ், ஒருநாள் பௌலர்களில் முகமது சிராஜ், டெஸ்ட் ஆல்-ரவுண்டரில் ரவீந்திர ஜடேஜா ஆகியோரும் முதலிடத்தை பிடித்துள்ளனர்.