கிங் கோலி!
விராட் கோலி 2008ஆம் ஆண்டு இந்திய அணியில் அறிமுகமானார். இருப்பினும், 2010ஆம் ஆண்டில்தான் புளு ஆர்மியில் நிரந்தர இடம் கிடைத்தது. 2009 முதல் 2019 வரை இவர் சதமடிக்காத ஆண்டே கிடையாது. துரதிர்ஷ்டவசமாக 2020ஆம் ஆண்டில் ஒரு சதம் கூட விளாசவில்லை. 2011 – 2020 இடைப்பட்ட காலத்தில் 20,000 ரன்கள் குவித்த ஒரே வீரர் கோலி. வேறு எந்த வீரரும் இவரை நெருங்கக் கூட முடியவில்லை. 2011 உலகக் கோப்பை, 2013ஆம் ஆண்டு சாம்பியன்ஸ் டிராபி போன்ற கோப்பைகளை வென்ற இந்திய XI அணியில் இடம்பெற்றிருந்தார். 2017, 2018ஆம் ஆண்டுகளில் தொடர்ச்சியாக இரண்டு ஆண்டுகள் ஐசிசியின் சிறந்த வீரராகத் தேர்வாகி இந்தியாவுக்குப் பெருமை சேர்த்தார்.
கேப்டன் பொறுப்பு!
விராட் கோலி 2013ஆம் ஆண்டு அதிரடி ஆட்டத்தை வெளிப்படுத்தி ஐசிசி ஒருநாள் தரவரிசையில் முதலிடம் பிடித்தார். தொடர்ந்து இந்திய அணி கேப்டனாக தன்னை முன்னிலைப் படுத்திக்கொள்ளும் வகையில் களத்தில் ஆக்ரோஷமாகச் செயல்படுவது, ஆளுமைத் திறனை வெளிப்படுத்துவது போன்ற செயல்களால், தோனிக்கு பின் விராட் கோலிதான் கேப்டன் எனப் பேசப்பட்டது. தோனி 2014ஆம் ஆண்டு டெஸ்ட் போட்டிகளிலிருந்து ஓய்வை அறிவித்த உடனே, பிசிசிஐ எவ்வித குழப்பமும், சச்சரவும் இல்லாமல் விராட் கோலியை டெஸ்ட் அணி கேப்டனாக அறிவித்தது.
தோனியைத் தொடர்ந்து கோலி!
2017ஆம் ஆண்டு தோனி அணியில் நீடித்தபோதே, விராட் கோலி ஒருநாள், டி20 அணிகளுக்கு கேப்டனாக பதவி உயர்வு பெற்றார். இதே ஆண்டில் கோலி தலைமையிலான இந்திய அணி சாம்பியன்ஸ் டிராபி தொடரில் இறுதிப் போட்டி வரை முன்னேறியது. அடுத்து 2019இல் நடைபெற்ற ஒருநாள் உலகக் கோப்பை தொடரில் அரையிறுதிவரை முன்னேறி நியூசிலாந்து அணியிடம் தோல்வியைத் தழுவியது. 2018ஆம் ஆண்டு கோலி தலைமையிலான இந்திய அணி 2-1 என ஆஸ்திரேலிய மண்ணில் முதல் முறையாக டெஸ்ட் தொடரைக் கைப்பற்றி வரலாற்றுச் சாதனை படைத்தது.
கோலியின் சாதனைகள்!
2013, 2018 ஆகிய ஆண்டுகளில் இலங்கை, மேற்கிந்தியத் தீவுகள் அணிக்கு எதிராகத் தொடர்ந்து மூன்று சதங்களை விளாசினார் கோலி. வேறு எந்த இந்திய வீரரும் இந்தச் சாதனையை இன்னும் படைக்கவில்லை. டெஸ்ட் போட்டிகளில் 7 இரட்டை சதங்கள் அடித்த முதல் வீரர். ஒரே வருடத்தில் 6 சதம் விளாசிய கேப்டனும் கோலி மட்டுமே. ஒருநாள் போட்டிகளில் அதிவிரைவாக 8000, 9000, 10000, 11000 ரன்களைக் கடந்த முதல் வீரராக உள்ளார். சர்வதேச ஒருநாள் போட்டியில் 12,000 ரன்களை (242 இன்னிங்ஸ்) அதிவிரைவாக எட்டிய முதல் வீரராகவும் கோலி திகழ்கிறார். இதற்குமுன் சச்சின் டெண்டுல்கர் 300 இன்னிங்ஸில் இந்த சாதனையைப் படைத்திருந்தார்.