தொடரை வெல்லும் வெறித்தனத்தில் வெஸ்ட் இண்டீஸ்... தடுக்குமா இந்திய அணி!

இந்திய அணியின் மிகப்பெரிய பலமாக கருதப்படுவது டாப் ஆர்டர் பேட்டிங் தான். முதல் ஒருநாள் போட்டியில் ராகுல், கோலி ஒரே ஓவரில் வெளியேறிய பின், களத்தில் இருந்த அனுபவ வீரர் ரோஹித், தேவையில்லாத ஷாட் தேர்வால் வெளியேறினார். இன்றைய போட்டியில் இந்த தவறை சரிசெய்து கடைசி வரை களத்தில் நின்று ரன்கள் சேர்க்க முயற்சிக்க வேண்டும்.

மேலும் நீண்ட நாட்களாக தொடரும் சிக்கலான மிடில் ஆர்டர் பேட்டிங் வரிசைக்கு ஸ்ரேயாஸ் ஐயர் முற்றுப்புள்ளி வைத்துள்ளார். முதல் போட்டியைப் போலவே ஸ்ரேயாஸ் இன்றும் கைகொடுக்கலாம். ரிஷப் பந்த் தனது சிறப்பான ஆட்டத்தை தொடர்ந்தால் நல்லது. கடைசி நேரத்தில் ரவிந்திர ஜடேஜா, கேதர் ஜாதவ் வேகமாக ரன்கள் சேர்க்க முயற்சிக்க வேண்டும்.

இந்திய அணியின் பவுலிங் தான் கடந்த போட்டியின் தோல்விக்கு முக்கியமான காரணம் எனலாம். தீபக் சஹார், ஷமி ஆகியோர் துவக்கத்தில் விக்கெட் வீழ்த்த தவறினர். அதேபோல ரவிந்திர ஜடேஜா, குல்தீப் கூட்டணி எடுபடவில்லை. இதனால் இன்று சஹாலுக்கு அணியில் இடம் கிடைக்கலாம். இது போன்ற நேரத்தில் தான் இந்திய ஆடுகளங்களைப்பற்றி நன்கு தெரிந்தும் கொண்ட அனுபவ பவுலர்களின் புறக்கணிப்பு பற்றிய கேள்வி எழுகிறது.

வெஸ்ட் இண்டீஸ் அணியை பொறுத்தவரையில் ஹோப், ஹெட்மயர் மீண்டும் மிரட்டலாம். இவர்களை தொடர்ந்து பூரன், சேஸ், போலார்டு, ஹோல்டர் என கடைசி வரை அந்த அணியின் அதிரடி பேட்டிங் வரிசை நீண்டு கொண்டே செல்கிறது. பவுலிங் காட்ரல், அல்ஜாரி ஜோசப் இன்றும் கைகொடுக்கலாம். சுழலில் வால்ஸ் ஜூனியர் தொல்லை தரலாம்.

சொந்த மண்ணில் இந்திய அணி கடந்த 2004, 2005இல் இரண்டு ஒருநாள் தொடர்களில் பாகிஸ்தானிடம் பறிகொடுத்தது. அதற்கு பின் இதுவரை இரண்டு ஒருநாள் தொடர்களில் தொடர்ச்சியாக தோல்வியை சந்தித்ததில்லை. ஆஸ்திரேலிய அணியிடன் ஒருநாள் தொடரை முன்னதாக பறிகொடுத்த இந்தியா அணி, இன்று கட்டாயம் வெற்றி பெற்றால் மட்டுமே இந்த மோசமான சாதனையில் இருந்து தப்ப முடியும்.

இந்திய கிரிக்கெட் அணியின் கேப்டன் கோலி இன்று தனது 400ஆவது சர்வதேச போட்டியில் களமிறங்குகிறார். இதுவரை 84 டெஸ்ட், 240 ஒருநாள், 75 டி–20 என 399 போட்டியில் 21,359 ரன்கள் (70 சதம், 100 அரைசதம் ) அடித்து அசத்தியுள்ளார் கோலி.