IND vs AUS: ‘2ஆவது டெஸ்ட் பாதியில்’…டேவிட் வார்னர் விலகல்: மாற்று வீரர் அறிவிப்பு? பேட்டிங்கும் களமிறங்குவார்!

இந்தியா வந்துள்ள ஆஸ்திரேலிய அணி நான்கு போட்டிகள் கொண்ட டெஸ்ட் தொடரில் பங்கேற்று விளையாடி வருகிறது.

இதில் நாக்பூரில் நடைபெற்ற முதல் போட்டியில் இந்திய அணி இன்னிங்ஸ் வெற்றியைப் பெற்ற நிலையில், தற்போது இரண்டாவது போட்டி இன்று டெல்லியில் துவங்கி நடைபெற்று வருகிறது. இப்போட்டியில் டாஸ் வென்ற ஆஸ்திரேலிய அணி முதலில் பேட்டிங்கை தேர்வு செய்தது.

வார்னர் சொதப்பல்:

இந்திய மண்ணில் நடைபெறும் டெஸ்ட் போட்டிகளில் டேவிட் வார்னர் தொடர்ந்து சொதப்பலாக விளையாடி வருகிறார். முதல் போட்டியில்கூட வார்னர் 20 ரன்களை கூட தொடவில்லை. இதனால், இரண்டாவது டெஸ்ட் போட்டியில் வார்னர் மீது அதிக எதிர்பார்ப்புகள் இருந்தது. இருப்பினும், வார்னர் வழக்கம்போல சொதப்பினார்.

தொடர்ந்து ஷார்ட் பால்:

குறிப்பாக, வார்னருக்கு எதிராக இந்திய வேகப்பந்து வீச்சாளர்கள் முகமது ஷமி, முகமது சிராஜ் இருவரும் தொடர்ந்து ஷார்ட் பால்களை வீசி அச்சுறுத்தினார்கள். அப்போது, முகமது சிராஜ் வீசிய ஒரு ஷார்ட் பால் வார்னரின் இடது கையில் பட்டது. உடனே, வார்னர் மருத்துவரை அழைத்தார். அப்போது மருத்துவர்கள் வார்னர் கையில் பேன்டேஜ் மட்டும் போட்டுவிட்டனர்.

வார்னர் அவுட்:

இதனைத் தொடருந்து வார்னர் பேட்டிங் செய்தார். அப்போதும் ஷமி, சிராஜ் இருவரும் தொடர்ந்து ஷார்ட் பால்களை வீசி அச்சுறுத்தினார்கள். இந்நிலையில், வார்னர் 15 (44) ரன்களை எடுத்து, ஷமி வீசிய ஷார்ட் பாலில் விக்கெட் கீப்பரிடம் கேட்ச் கொடுத்து நடையைக் கட்டினார்.

இதனைத் தொடர்ந்து ஆஸ்திரேலிய அணியில் ஓபனர் கவாஜா 81 (125), ஹேன்ட்ஸ்ஹோம் 72 (142) ஆகியோர் அபாரமாக விளையாடியதால், ஆஸ்திரேலிய அணி முதல் இன்னிங்ஸில் 263/10 ரன்களை சேர்த்தது.

வார்னர் வரவில்லை...மாற்று இவர்தான்:

அடுத்து இந்திய அணி முதல் இன்னிங்ஸ் களமிறங்கியபோது டேவிட் வார்னர் பீல்டிங் செய்ய வரவில்லை. இந்நிலையில் தற்போது வெளியாகியுள்ள தகவலில், வார்னருக்கு கையில் பெரிய அளவில் காயம் ஏற்பட்டுள்ளதால் அவர் இரண்டாவது டெஸ்டின் எஞ்சிய தினங்களில் விளையாட மாட்டார் என்றும், இவருக்கு மாற்றாக பேட்டர் ரென்ஷோ சேர்க்கப்பட்டுள்ளார் என தெரிவிக்கப்பட்டுள்ளது. ரென்ஷோவால் இரண்டாவது இன்னிங்ஸில் பேட்டிங் களமிறங்க முடியும்.

இந்திய இன்னிங்ஸ்:

இந்திய அணி முதல் இன்னிங்ஸில் தற்போதுவரை 21/0 ரன்கள் சேர்த்துள்ளது. ரோஹித் ஷர்மா 13 (34), கே.எல்.ராகுல் 4 (20) ஆகியோர் களத்தில் இருக்கிறார்கள். இன்று இரண்டாவது நாள் ஆட்டம் நடைபெறும்.