IND vs AUS Test: ‘மொத்தம் 3 ஆஸி பௌலர்கள் விலகல்?’…3 பேருமே முரட்டு பௌலர்கள்தான்: இந்தியாவுக்கு லக்!

இன்னும் சில தினங்களில் இந்தியா, ஆஸ்திரேலியா பங்கேற்கும் 4 போட்டிகள் கொண்ட பார்டர் கவாஸ்கர் டெஸ்ட் தொடர் துவங்கி நடைபெறவுள்ளது. பிப்ரவரி 9-13, 17-21 மற்றும் மார்ச் 1-5, 9-13 ஆகிய தேதிகளில் போட்டிகள் நடைபெறவுள்ளன.

டெஸ்ட் சாம்பியன்ஷிப் பைனல்:

இத்தொடரில் இந்திய அணி 3-0 அல்லது 3-1 என்ற கணக்கில் வென்றாக வேண்டும். கடந்த இரண்டுமுறை ஆஸ்திரேலிய மண்ணில் இந்திய அணி டெஸ்ட் தொடரைக் கைப்பற்றியதால், இம்முறை இந்திய மண்ணில் டெஸ்ட் தொடரை கைப்பற்றி பதிலடி கொடுக்க ஆஸ்திரேலிய அணி கடுமையாக போராடும் எனக் கருதப்படுகிறது.

3 பௌலர்கள் விலகல்:

இந்நிலையில், மூன்று ஆஸ்திரேலிய பௌலர்கள் காயம் காரணாமக முதல் போட்டியில் பங்கேற்க மாட்டார்கள் என அறிவிக்கப்பட்டுள்ளது.

மிட்செல் ஸ்டார்க் விலகல்:

உலகின் எந்த மைதானத்திலும், மிரட்டலாக பந்துவீசக் கூடிய ஒருசிலரில் மிட்செல் ஸ்டார்க்கும் ஒருவர். இத்தொடருக்கான அணி அறிவிக்கப்பட்ட போதே, இவர் காயம் காரணமாக அவதிப்பட்டு வந்தார். இருப்பினும், அணியில் இடம் வழங்கப்பட்டது. அப்போதே, ஸ்டார்க் முதல் போட்டியில் விளையாட மாட்டார் எனத் தெரிவிக்கப்பட்டிருந்தது.

கிரீன் விலகல்:

விரல் வலி காரணமாக ஆஸ்திரேலிய அணியின் வேகப்பந்து வீச்சு ஆல்-ரவுண்டர் கேமரூன் கிரீன் முதல் டெஸ்ட் போட்டியில் இருந்து விலகியுள்ளார். இது நிச்சயம் ஆஸ்திரேலிய அணிக்கு பின்னடைவான விஷயம்தான்.

கேமரூன் கிரீன் மொத்தம் 18 டெஸ்ட்களில் 6 அரை சதங்கள் உட்பட 806 ரன்களை குவித்துள்ளார். மேலும், 23 விக்கெட்களையும் சாய்த்து முரட்டு பார்மில் இருக்கிறார். இவர் இடம்பெற்றால் ஒரு பௌலரை குறைத்துவிட்டு, கூடுதலாக ஒரு பேட்ஸ்மேனை சேர்த்திருக்க முடியும். இவர் இல்லாததால், தற்போது ஆஸ்திரேலிய பிளேயிங் லெவனில் பெரும் குழப்பம் ஏற்பட்டுள்ளது.

ஹேசில்வுட் விலகல்?

இந்நிலையில், இடது காலில் ஏற்பட்ட காயம் காரணமாக, ஆஸ்திரேலிய அணியின் நட்சத்திர வேகப்பந்து வீச்சாளர் ஜோஷ் ஹேசில்வுட் முதல் இரண்டு போட்டிகளில் இருந்து விலக உள்ளதாக தகவல் வெளியாகியுள்ளது. இவர் மிகவும் உயரமான பௌலர் என்பதால், இந்திய மண்ணில் சிறப்பாக பவுன்சர் பந்துகளை வீச முடியும். இவரும் முதல் இரண்டு போட்டிகளில் இருந்து விலக உள்ளதால், ஆஸ்திரேலிய அணிக்கு தற்போதே கடும் பின்னடைவு ஏற்பட்டுள்ளது என்பது குறிப்பிடத்தக்கது.