நம்பர்-1 இடத்தை பறிகொடுத்த இந்திய அணி... !

சர்வதேச கிரிக்கெட் அரங்கில் சிறந்து விளங்கும் அணிகளுக்கான டெஸ்ட் தரவரிசையில் இந்திய அணி இரண்டு புள்ளிகள் குறைந்து (114) நம்பர்-1 இடத்தை பறிகொடுத்தது. ஆஸ்திரேலிய அணி இரண்டு புள்ளிகள் (116) முதல் இடத்துக்கு முன்னேறியது. நியூசிலாந்து (115) இரண்டாவது இடத்தில் நீடிக்கிறது. இங்கிலாந்து (105), இலங்கை (91) அடுத்த இரண்டு இடத்தில் உள்ளன.

நீடிக்கும் கோலி
சிறந்த பேட்ஸ்மேன்களுக்கான ரேங்கிங் (தரவரிசைப்பட்டியல்) பட்டியலில் ஆஸ்திரேலியாவின் ஸ்டீவ் ஸ்மித் (911) நம்பர் -1 இடத்தில் நீடிக்கிறார். இந்திய கிரிக்கெட் கேப்டன் விராட் கோலி (886 புள்ளிகள்) இரண்டாவது இடத்தில் உள்ளார். ஆஸ்திரேலிய வீரர் மார்னஸ் லபுஷேன் (827) மூன்றாவது இடம் உள்ளார்.

ரஹானே பின்னடைவு
நியூசிலாந்தின் கேன் வில்லியம்சன் (813) நான்காவது இடத்துக்கு தள்ளப்பட்டார். பாகிஸ்தானின் பாபர் அசாம் (800), ஆஸ்திரேலியாவின் டேவிட் வார்னர் (793) ஐந்தாவது, ஆறாவது இடத்தில் உள்ளனர். இந்திய வீரர்களான புஜாரா (766), ரஹானே (726) பின்னடைவை சந்தித்துள்ளனர். மற்ற இந்திய வீரர்கள் யாரும் ‘டாப்-10’ல் இடம் பெறவில்லை.

_{எங்க டீம் கஜினி இவரு தான்... சரியான நியாபக மறதி கேஸ்: கிங் கோலி!}

கம்மின்ஸ் நம்பர்-1
சிறந்த பவுலர்களுக்கான ரேங்கிங்கில் ஆஸ்திரேலிய வேகப்பந்துவீச்சாளர் பாட் கம்மின்ஸ் (904) தனது நம்பர்-1 இடத்தை தக்க வைத்துக்கொண்டார். நியூசிலாந்தின் நீல் வாக்னர் (843), வெஸ்ட் இண்டீஸ் வீரர் ஜேசன் ஹோல்டர் (830) அடுத்த இரண்டு இடங்களில் உள்ளனர். இந்திய வேகப் பந்துவீச்சாளர் ஜஸ்பிரீத் பும்ரா (779) 7ஆவது இடத்தில் உள்ளார். அஸ்வின் (757) 12ஆவது இடத்திலும், முகம்மது ஷமி (749) 15ஆவது இடத்திலும் உள்ளனர்.

ஹோல்டர் டாப்
சிறந்த ஆல் ரவுண்டர்கள் பட்டியலில், வெஸ்ட் இண்டீஸ் வீரர் ஜேசன் ஹோல்டர் (473) நம்பர்-1 இடத்தில் உள்ளார். இங்கிலாந்தின் பென் ஸ்டோக்ஸ் (407) இரண்டாவது இடத்தில் நீடிக்கிறார். இந்தியாவின் ரவிந்திர ஜடேஜா (397) மூன்றாவது இடத்தில் உள்ளார்.