IND vs NZ 2nd Test: ‘இந்திய அணி’…உத்தேச XI இதுதான்: ஓபனராக களமிறங்கவுள்ள அறிமுக வீரர்!

இந்தியா வந்துள்ள நியூசிலாந்து அணி மூன்று போட்டிகள் கொண்ட டி20 தொடர், இரண்டு போட்டிகள் கொண்ட டெஸ்ட் தொடரில் பங்கேற்று விளையாடி வருகிறது. டி20 தொடரை 3-0 என இந்தியா கைப்பற்றிய நிலையில், கான்பூரில் விறுவிறுப்பாக நடைபெற்ற முதல் டெஸ்ட், கடைசி நேரத்தில் டிரா ஆனது. அடுத்து இரண்டாவது டெஸ்ட் போட்டி மும்பை வான்கடே மைதானத்தில், நாளைமுதல் துவங்கி நடைபெறவுள்ளது.

கோலி வருகை:

முதல் டெஸ்ட் போட்டியின்போது ஓய்வில் இருந்த கேப்டன் கேப்டன் விராட் கோலி, இரண்டாவது டெஸ்டில் களமிறங்கவுள்ளார். இதனால் அஜிங்கிய ரஹானே, சேத்தேஸ்வர் புஜாரா, ஷ்ரேயஸ் ஐயர் ஓபனர் மயங்க் அகர்வால் ஆகியோரில் ஒருவர் நீக்கப்பட வேண்டிய கட்டாயம் இருக்கிறது.

அஜிங்கிய ரஹானே, சேத்தேஸ்வர் புஜாரா இருவரும் அனுபவ வீரர்கள். இவர்களுக்கு ஒரு வாய்ப்பு கொடுத்து பார்க்க இந்திய அணி விரும்பும் எனத் தெரிகிறது. அடுத்து, ஷ்ரேயஸ் ஐயர். இவர் முதல் டெஸ்ட் போட்டியிலேயே சதம், அரை சதம் அடித்து தனது இடத்தை உறுதிசெய்துவிட்டார். இதனால், ஓபனர் மயங்க் அகர்வால்தான் நீக்கப்படுவார் எனக் கருதப்படுகிறது.

மேலும், விக்கெட் கீப்பர் பேட்ஸ்மேன் விருத்திமான் சாஹா காயத்தில் அவதிப்படுவதால் அறிமுக வீரர் கே.எஸ்.பரத்தை களமிறக்கியே ஆக வேண்டும். இவர் ஓபனராக களமிறங்கக் கூடியவர். இதன்காரணமாகவும் மயங்க் அகர்வால் நீக்கப்பட வேண்டிய தேவை இருக்கிறது.

மற்றபடி பந்துவீச்சைப் பொறுத்தவரை மும்பை வான்கடே மைதானம் வேகப்பந்து வீச்சுக்கு ஒத்துழைப்பு தரும் எனக் கணிக்கப்பட்டுள்ளது. இதனால், இந்தியா அதிகபட்சமாக இரண்டு ஸ்பின்னர்களுடன் மட்டுமே களமிறங்கும் என கருதப்படுகிறது. மற்றபடி வேகப்பந்து வீச்சைப் பொறுத்தவரை உமேஷ் யாதவுடன், முகமது சிராஜ் மற்றும் பிரசித் கிருஷ்ணா ஆகியோர் கூடுதலாக சேர்க்கப்பட வாய்ப்புள்ளதாக கூறப்படுகிறது.

இந்திய உத்தேச XI: ஷுப்மன் கில், கே.எஸ் பரத், சேத்தேஸ்வர் புஜாரா, விராட் கோலி, ஷ்ரேயஸ் ஐயர், அஜிங்கிய ரஹானே, ரவீந்திர ஜடேஜா, ரவிச்சந்திரன் அஸ்வின், அக்சர் படேல் / பிரசித் கிருஷ்ணா, உமேஷ் யாதவ், முகமது சிராஜ்.