Ind vs Sl 1st T20: இந்திய உத்தேச XI அணி இதுதான்…டிராவிட் அதிரடி திட்டம்: தமிழக வீரருக்கு வாய்ப்பு?

இலங்கைக்கு எதிரான 3 போட்டிகள் கொண்ட ஒருநாள் தொடரை இந்திய அணி 2-1 என்ற கணக்கில் கைப்பற்றிய நிலையில் இன்றுமுதல், 3 போட்டிகள் கொண்ட டி20 தொடர் நடைபெறவுள்ளது.

டி20 உலகக் கோப்பை:

வரும் அக்டோபர் மாதம் டி20 உலகக் கோப்பை துவங்கி நடைபெறவுள்ளது. இன்று துவங்கவுள்ள இலங்கைக்கு எதிரான டி20 தொடரில், இளம் இந்திய வீரர்கள் சிறப்பாக சோபிக்கும் பட்சத்தில் அவர்கள் அவர்களுக்கு டி20 உலகக் கோப்பை அணியில் இடம் கிடைக்கும். இதனால், இந்த இலங்கைக்கு எதிரான டி20 தொடர் முக்கியத்துவம் வாய்ந்ததாக உள்ளது.

யார் யாருக்கு இடம்:

இலங்கைக்கு எதிரான ஒருநாள் தொடரில் ஷிகர் தவனுடன் பிரித்வி ஷா மட்டுமே களமிறங்கி வந்தார். தற்போது துவங்கவுள்ள டி20 தொடரில் தவனுடன் ருதுராஜ் கெய்க்வாட் அல்லது தேவ்தத் படிக்கல் இருவரில் ஒருவர் களமிறங்க வாய்ப்புள்ளது. குறிப்பாக, படிக்கல்தான் ஓபனராக களமிறங்குவார் எனக் கூறப்படுகிறது. அடுத்த இடம் விக்கெட் கீப்பர் பேட்ஸ்மேன் இஷான் கிஷனுக்கு ஒதுக்கப்பட்டதாகத் தெரிகிறது.

சூர்யகுமார் யாதவ் நல்ல பார்மில் இருப்பதால், இவர் நீக்கப்பட்டு, சஞ்சு சாம்சனுக்கு திறைமையை நிரூபிக்க ஒரு வாய்ப்பு கொடுக்கப்படலாம். ஆல்-ரவுண்டருக்கான இடத்தில் பாண்டியா சகோதரர்கள் களமிறங்க வாய்ப்புள்ளது. ஹார்திக் பாண்டியா ஒருநாள் தொடரில் சிறப்பாக சோபிக்கவில்லை. டி20 தொடரில் தனது திறமையை நிரூபிக்க வேண்டிய இடத்தில் இருக்கிறார். க்ருனால் பாண்டியா பேட்டிங், பந்துவீச்சு இரண்டிலும் நம்பிக்கையளிக்கக் கூடிய வகையில் செயல்பட்டு வருகிறார்கள்.

தமிழக வீரருக்கு இடம்:

வேகப் பந்துவீச்சை பொறுத்தவரை புவனேஷ்வர் குமார், தீபக் சஹார், நவ்தீப் சைனி ஆகியோர் களமிறங்கவுள்ளதாக தெரிகிறது. சுழற்பந்து வீச்சாளர் வருண் சக்ரவர்த்திக்கு ஒருநாள் தொடரின்போது வாய்ப்பு வழங்கப்படவில்லை. இவர் டி20 கிரிக்கெட்டில் சிறப்பாகப் பந்துவீசக் கூடியவர். இதனால், இவருக்கு முதல் போட்டியில் வாய்ப்பு கிடைக்கும் எனக் கருதப்படுகிறது. கடைசியாக ராகுல் சஹார் களமிறக்கப்பட வாய்ப்புள்ளது.

இந்திய உத்தேச XI அணி: ஷிகர் தவன், தேவ்தத் படிக்கல், இஷான் கிஷன், சஞ்சு சாம்சன், ஹார்திக் பாண்டியா, க்ருனால் பாண்டியா, தீபக் சஹார், புவனேஷ்வர் குமார், நவ்தீப் சைனி, ராகுல் சஹார், வருண் சக்ரவர்த்தி