பிப்ரவரி 1, 2008 – மெல்போர்ன்!
இந்தியா, ஆஸ்திரேலியா இடையே நடைபெற்ற இப்போட்டியில் ஆஸ்திரேலிய அணி 9 விக்கெட் வித்தியாசத்தில் அபார வெற்றிபெற்றது. முதலில் களமிறங்கிய இந்திய அணி அனைத்து விக்கெட்களையும் இழந்து 74 ரன்கள் மட்டுமே எடுத்தது. எளிய இலக்கை நோக்கிக் களமிறங்கிய ஆஸ்திரேலிய அணி 11.2 ஓவர்களில் வெற்றிபெற்று அசத்தியது. இந்திய அணி தரப்பில் இர்பான் பதான் மட்டுமே இரட்டை இலக்க ரன்களை (26) எடுத்திருந்தார். இந்திய அணி மொத்தம் 3 பவுண்டரிகளை மட்டுமே அடித்திருந்தது. கடைசி விக்கெட்டாக களமிறங்கிய இஷாந்த் ஷர்மாவுக்கு 9 பீல்டர்களும் நெருக்கத்தில் நின்று கெத்து காட்டினர். இந்திய அணிக்கு எதிராக ஆஸ்திரேலிய வெற்றிபெற்ற முதல் டி20 போட்டி இதுவாகும்.
ஜனவரி 26, 2016 – அடிலெய்டு!
இந்தியா, ஆஸ்திரேலியா இடையிலான மூன்று போட்டிகள் கொண்ட டி20 தொடரின் முதல் போட்டி அடிலெய்டு மைதானத்தில் நடைபெற்றது. இதில், இந்திய அணி 37 ரன்கள் வித்தியாசத்தில் ஆஸ்திரேலியாவை தோற்கடித்தது. இப்போட்டியில் விராட் கோலி 55 பந்துகளில் 9 பவுண்டரி, 2 சிக்ஸர் அடித்திருந்தார். சுரேஷ் ரெய்னா 34 பந்துகளில் 41 ரன்களும், ரோஹித் ஷர்மா 20 பந்துகளில் 31 ரன்களும் எடுத்து ஸ்கோரை 188 ரன்களாக உயர்த்தினர். ஆஸ்திரேலிய அணி 151 ரன்கள் மட்டுமே எடுத்து தோல்வியைச் சந்தித்தது. ஜஸ்பரீத் பும்ரா 23 ரன்களை மட்டும் விட்டுக்கொடுத்து 3 விக்கெட்களைக் கைப்பற்றினார்.
ஜனவரி 31, 2016 - மூன்றாவது டி20 போட்டி:
இந்தியா, ஆஸ்திரேலியா இடையில் மூன்று போட்டிகள் கொண்ட டி20 தொடரின் கடைசிப் போட்டியில், இந்திய அணி 7 விக்கெட் வித்தியாசத்தில் வெற்றிபெற்று 3-0 என ஆஸ்திரேலியாவை ஒயிட் வாஷ் செய்தது. முதலில் களமிறங்கிய ஆஸ்திரேலிய அணி 197 ரன்கள் குவித்தது. ஷேன் வாட்சன் 71 பந்துகளில் 124 ரன்கள் எடுத்திருந்தார். கடின இலக்கைத் துரத்திக்கொண்டு களமிறங்கிய இந்திய அணியில் ரோஹித் ஷர்மா (52), விராட் கோலி (50), சுரேஷ் ரெய்னா (49*) ஆகியோர் சிறப்பாக விளையாடி அணிக்கு வெற்றியைத் தேடித்தந்தனர்.
நவம்பர் 21, 2018 – பிரிஸ்பேன்!
இந்தியா, ஆஸ்திரேலியா இடையிலான மூன்றாவது டி20 போட்டியில் மழையின் குறுக்கீடு அதிகமாக இருந்தது. முதலில் களமிறங்கிய ஆஸ்திரேலிய அணி 17 ஓவர்களில் 158 ரன்கள் எடுத்திருந்தபோது மழை பெய்தது. இதனால், இந்திய அணி 17 ஓவர்களில் 174 ரன்கள் அடிக்க வேண்டும் என்று இலக்கு நிர்ணயம் செய்யப்பட்டது. துவக்க வீரர் ஷிகர் தவன் 42 பந்துகளில் 76 ரன்கள் சேர்த்து வலுவான தவக்கம் தந்த நிலையில், மற்றவர்களும் அழுத்தமின்றி அதிரடியாக விளையாடினர். இறுதியில் 12 பந்துகளுக்கு 30 ரன்கள் தேவைப்பட்ட நிலையில், 4 ரன்கள் வித்தியாசத்தில் இந்திய அணி தோல்வியைச் சந்தித்தது.