IND vs NZ 2nd Test: அடுத்தடுத்து டக்-அவுட்…ஷாக் கொடுத்த இந்திய பேட்ஸ்மேன்கள்: நியூசி திடீர் எழுச்சி!

இந்தியா, நியூசிலாந்து இடையில் இரண்டு போட்டிகள் கொண்ட டெஸ்ட் தொடர் நடைபெற்று வருகிறது. கான்பூரில் நடைபெற்ற முதல் போட்டி டிரா ஆன நிலையில், இன்று மும்பை வான்கடேவில் இரண்டாவது போட்டி துவங்கி நடைபெற்று வருகிறது. இதில் டாஸ் வென்ற இந்திய அணி முதலில் பேட்டிங் தேர்வுசெய்து, திடீரென்று விக்கெட்களை இழந்து திணறி வருகிறது.

இந்திய இன்னிங்ஸ்:

இந்திய அணி ஓபனர்களாக மயங்க் அகர்வால், ஷுப்மன் கில் ஆகியோர் களமிறங்கினர். இருவரும் நிதானமான துவக்கம் தந்ததால் இந்தியா 50+ ரன்கள் கடந்து சிறப்பாக விளையாடி வந்தது. நியூசிலாந்து பௌலர்கள் எவ்வளவோ முயன்றும் விக்கெட்கள் எதுவும் கைப்பற்ற முடியவில்லை. இந்நிலையில், ஆஜஸ் படேல் வீசிய பந்துகள் அதிகளவில் சுழன்றதால், அவருக்கு தொடர்ந்து ஓவர்கள் வழங்கப்பட்டது. அவரும் சிறப்பாக பந்துகளை சுழற்றி ஷுப்மன் கில் 44 (71) விக்கெட்டை எடுத்துக்கொடுத்தார்.

இதனைத் தொடர்ந்து அடுத்த ஓவரிலேயே சேத்தேஸ்வர் புஜாரா 0 (5), விராட் கோலி 0 (5) ஆகியோரின் விக்கெட்டை எடுத்துக் கொடுத்து கெத்து காட்டினார். இதனால், இந்தியா 79/0 என்பதில் இருந்து 80/3 என மாறியது. விராட் கோலி பந்தை அடித்தபோது அது பேட், பேடிற்கு இடையில் உரசி சென்றது. விராட் கோலி ரிவியூ எடுத்தபோது, மூன்றாம் நடுவரால் முடிவினை தீர்மானிக்க முடியவில்லை. இதனால், அவர் களத்தில் இருக்கும் நடுவரின் தீர்ப்பை சரியென கூறி LBW அவுட் கொடுத்தார். கோலி இதனை ஏற்காமல் நடுவர் நிதின் மேனனிடம் முறையிட்டு அதன்பிறகு நடையைக் கட்டினார். இந்தியா ஓரே ஓவரில் இரண்டு மெயின் விக்கெட்களை, ரன்களை எதுவும் இல்லாமல் இழந்தது.

இந்த நெருக்கடியை சமாளிக்க ஆஜஸ் படேல் வீசிய அடுத்த ஓவரில் மயங்க் அகர்வால் ஒரு சிக்ஸர், பவுண்டரி அடித்து அசத்தினார். தற்போது மயங்க் அகர்வால் 52 (121), ஷ்ரேயஸ் ஐயர் 7 (21) ஆகியோர் களத்தில் இருக்கிறார்கள். இந்தியா 95/3 என இருக்கும் நிலையில், முதல்நாள் முதல் செஷன் நிறைவடைந்துள்ளது. மழை காரணமாக போட்டி தாமதமாக துவங்கியதால், இன்று இரண்டு செஷன்வரை மட்டுமே நடைபெறும் என அறிவிக்கப்பட்டுள்ளது.

முதல் செஷன்: 12:00 மணி முதல் 2:40 வரை
2ஆவது செஷன்: 3:00 மணி முதல் 5:30 வரை