சந்தேகம்
இந்தியா வரும் வெஸ்ட் இண்டீஸ் அணி, மூன்று டி-20, மூன்று ஒருநாள் போட்டிகள் கொண்ட தொடரில் பங்கேற்கிறது. இதில் முதல் டி-20 போட்டி வரும் டிசம்பர் 6ம் தேதி மும்பையின் வான்கடே மைதானத்தில் நடக்கவுள்ளது.
என்ன காரணம்?
இதற்கிடையில் டிசம்பர் 6ஆம் தேதி, இந்திய அரசியலமைப்புச் சட்டத்தை இயற்றிய அம்பேத்கரின் நினைவு தினம் அனுசரிக்கப்படுவதால், அன்று போதிய பாதுகாப்பு வழங்கமுடியாது என மும்பை போலீசார் தெரிவித்துள்ளதாக கூறப்படுகிறது. இதனால் பாதுகாப்பு காரணங்கள் கருதி போட்டியை வேறு இடத்துக்கு மாற்றப்பட வாய்ப்பு உள்ளதாக தெரிகிறது.
மேலும் சிக்கல்
அன்றைய தினத்தில் டாடரில் உள்ள சிவாஜி பூக்காவில் அம்பேத்கருக்கு அஞ்சலி செலுத்த மக்கள் அதிகளவில் கூடுவார்கள். மேலும் பாபர் மசூதி இடிக்கப்பட்ட தினமாகவும் டிசம்பர் 6ஆம் தேதி இருப்பதால், டி-20 போட்டிக்கு பாதுகாப்பு வழங்குவதில் அதிக சிக்கல் உள்ளதாகவும் கூறப்படுகிறது. கடந்த நவம்பர் 9ஆம் தேதி இந்த வழக்கில் தீர்ப்பு வழங்கப்பட்டது. இதனால் அசம்பாவிதம் எதுவும் நடக்காமல் இருக்க போலீசார் அதிகளவில் பாதுகாப்பு பணியில் ஈடுபடுவார்கள்.
வேறு தினத்துக்கு
இதுதொடர்பாக மும்பை கிரிக்கெட் சங்க அதிகாரி ஒருவர் கூறுகையில்,“ மும்பை போலீசார் கிரிக்கெட் போர்டு அதிகாரிகளை சந்தித்து பாதுகாப்பு சிக்கல் குறித்து பேச்சுவார்த்தை நடத்தினார்கள். மேலும் போட்டியை வேறு தினத்தில் நடத்த வாய்ப்பு உள்ளதா என கேட்டனர். இதனால் இந்தியா, வெஸ்ட் இண்டீஸ் அணிகள் மோதும் முதல் டி-20 போட்டியை மும்பையில் நடத்த முடியுமா என்ற கேள்வி எழுந்துள்ளது. அதேநேரம் போட்டியை வேறு தினத்தில் நடத்த பிசிசிஐ ஒப்புக்கொள்ளும் என மும்பை கிரிக்கெட் போர்டு அதிகாரிகள் நம்பிக்கை தெரிவித்தனர். இருந்தாலும் போட்டியை வேறு இடத்துக்கு மாற்றவும் பிசிசிஐ முடிவு செய்யலாம்.” என்றார்.