Murali Vijay: எப்பவுமே ஒரே ‘தல’... அது தோனி தான்...: இந்தியாவுக்கு தான் உலகக்கோப்பை: முரளி விஜய்!

காட்பாடி: இம்முறை இந்திய அணி தான் உலக கோப்பை வெல்லும் என இந்திய கிரிக்கெட் வீரர் முரளி விஜய் தெரிவித்துள்ளார். இங்கிலாந்து மற்றும் வேல்ஸில் இந்த ஆண்டு உலகக்கோப்பை கிரிக்கெட் தொடர் நடக்கவுள்ளது. இத்தொடர் மே 30, 2019ல் துவங்கி ஜூன் 14, 2019 வரை நடக்கவுள்ளது. மொத்தமாக 45 லீக் போட்டிகள் மற்றும் 3 நாக் - அவுட் போட்டிகள் என 48 போட்டிகள் சுமார் 12 நகரங்களில் நடக்கவுள்ளது. கடந்த 1992ல் பென்ஷன் மற்றும் ஹெட்ஜ்ஸ் உலகக்கோப்பை முறைப்படி இத்தொடர் நடக்கவுள்ளது.

இந்நிலையில் வேலூர் மாவட்டம் காட்பாடியில் தொழில்நுட்ப பல்கலைக்கழகத்தில் இன்று சர்வதேச கலாச்சார விளையாட்டு திருவிழா துவங்கியது. இதில் சர்வதேச அளவில் 700 பல்கலைகழகங்களை சேர்ந்த 38 ஆயிரம் மாணவர்கள் கலந்துகொண்டுள்ளனர்.

இதற்கான துவக்க விழாவில் இந்திய கிரிக்கெட் வீரர் முரளி விஜய் கலந்துகொண்டு மாரத்தான் போட்டியில் வெற்றி பெற்றவர்களுக்கு பரிசுகளை வழங்கினார். பின் மாணவர்களிடம் பேசிய முரளி விஜய், ‘ இளம் வயது முதலே கிரிக்கெட்டை மிகுந்த ஆர்வத்துடன் விளையாடி வருகிறேன். தோனி அணி தலைவராக சிறப்பாக செயல்பட்டார்.
இந்திய அணி 2019 இங்கிலாந்தில் நடக்கவுள்ள உலககோப்பை தொடரில் கோப்பை வென்று சாதிக்கும். கிரிக்கெட்டின் ஒரே தல அது தோனி தான்.’ என்றார்.