தல – தளபதியின் கூட்டணியால் இந்தியா அபார வெற்றி!

நியூசிலாந்து அணி இந்தியாவில் சுற்றுப்பயணம் மேற்கொண்டு விளையாடி வருகிறது. நடந்து முடிந்த டெஸ்ட் தொடரை இந்தியா 3-0 என்று கைப்பற்றியது. இதனைத் தொடர்ந்து நடந்து வரும் 5 போட்டிகள் கொண்ட ஒருநாள் தொடரின் முதல் ஆட்டத்தில் இந்தியா 6 விக்கெட் வித்தியாசத்தில் வெற்றி பெற்றது. ஆனால், 2வது போட்டியில் 6 ரன்கள் வித்தியாசத்தில் தோல்வியை தழுவியது.

இந்நிலையில் மூன்றாவது போட்டி மொஹாலியில் உள்ள பஞ்சாப் கிரிக்கெட் சங்க மைதானத்தில் நடந்து வருகிறது. இதில் டாஸ் வென்ற இந்திய அணி பீல்டிங் தேர்வு செய்தது. இதன் படி முதலில் ஆடிய நியூசிலாந்து அணி 49.4 ஓவரில் அனைத்து விக்கெட்டுகளையும் இழந்து 285 ரன்கள் குவித்தது. இதில் லாதம் (61), நீசம் (57), ராஸ் டெய்லர் (44) ஆகியோர் சிறப்பான ஆட்டத்தை வெளிப்படுத்தினர். இந்தியா தரப்பில் யாதவ், ஜாதவ் ஆகியோர் தலா 3 விக்கெட்டுகளை கைப்பற்றினர்.

பின்னர் 286 ரன்களை இலக்காக கொண்ட இந்திய அணியில் ரோக்த் சர்மா (13) மற்றும் ரகானே (5) ஆகியோர் ஏமாற்றம் அளித்தனர். அடுத்து வந்த தல மற்றும் தளபதியான தோனி மற்றும் கோலி கூட்டணி அபாரமான ஆட்டத்தை வெளிப்படுத்தியது. கோலி கொடுத்த எளிதான கேட்ச்சை நியூசிலாந்தின் ராஸ் டெய்லர் தவற விட்டார். சிறப்பாக ஆடி வந்த தோனி 91 பந்துகளில் 8 பவுண்டரிகள், 3 சிக்சர்கள் உள்பட 80 ரன்கள் சேர்த்து ஹென்றி பந்தில் டெய்லரிடம் கேட்ச் கொடுத்து வெளியேறினார்.

வெளியேறிய பிறகு தன்னுடைய அறைக்கு சென்ற தோனி அங்கு உட்காரவே இல்லையாம். தன்னுடைய தளபதியான கோலியின் ஆட்டத்தை கண்டு ரசித்துள்ளார். தோனியை அடுத்து களமிறங்கிய பாண்டே கோலிக்கு உதவியாக இருந்தார். தொடர்ந்து அபாரமாக ஆடி வந்த கோலி தன்னுடைய 26வது சதத்தை பூர்த்தி செய்து அதிக சதங்கள் அடித்த பட்டியலில் 4வது இடத்தை பிடித்துள்ளார். முதலில் கிரிக்கெட் ஜாம்பவான் சச்சின், 2வது ரிக்கி பாண்டிங், 3வது ஜெயசூர்யா ஆகியோர் உள்ளனர்.

இறுதியாக இந்தியா 48.2வது ஓவரில் 3 விக்கெட்டுகளை இழந்து 289 ரன்கள் எடுத்து 7 விக்கெட் வித்தியாசத்தில் வெற்றி பெற்றது. இந்தியாவின் ரன் மெஷின் என்றழைக்கப்படும் கோலி அபாரமாக ஆடி 154 ரன்கள் சேர்த்து இந்தியாவின் வெற்றிக்கு வித்திட்டார். பாண்டே 28 ரன்கள் சேர்த்தார் என்பது குறிப்பிடத்தக்கது. இந்த வெற்றியின் மூலம் 5 போட்டிகள் கொண்ட ஒருநாள் தொடரில் இந்தியா 2-1 என்று முன்னிலை பெற்றுள்ளது. இதனைத் தொடர்ந்து 4வது ஒருநாள் போட்டி வருகிற 26ம் தேதி ராஞ்சியில் நடக்கயிருக்கிறது என்பது குறிப்பிடத்தக்கது.

The right-hander scores his 26th ODI hundred (154) as India beat NZ by seven wickets