அடுத்த சேவாக் இவர்தான், மாற்றமே இல்ல…’என்னா அடி’: இந்திய கோச் புகழாரம்!

இந்திய மகளிர் அணி இங்கிலாந்து சுற்றுப் பயணம் மேற்கொண்டு ஒரு போட்டி கொண்ட டெஸ்ட் தொடரில் பங்கேற்று விளையாடி வருகிறது. இதில் முதலில் களமிறங்கிய இங்கிலாந்து மகளிர் அணி முதல் இன்னிங்ஸில் 396/9 ரன்கள் எடுத்து டிக்ளேர் அறிவித்தது. அடுத்துக் களமிறங்கிய இந்திய மகளிர் அணியில் ஸ்மிருதி மந்தனா, 17 வயதான ஷபாலி வர்மா இருவரும் ஓபனர்களாக களமிறங்கினர். இந்த பார்ட்னர்ஷிப் நீண்ட நேரம் நிலைத்தது.

மந்தனா 155 பந்துகளில் 78 ரன்களும், ஷபாலி 152 பந்துகளில் 96 ரன்களும் குவித்து அசத்தினார். அதன்பிறகு களமிறங்கிய யாரும் சிறப்பாக சோபிக்கவில்லை. இதனால் 167/1 என இருந்த இந்திய மகளிர் அணி, அடுத்தடுத்து விக்கெட்களை பறிகொடுத்து 231 ரன்களுக்கு ஆல்அவுட் ஆனது. இந்திய மகளிர் அணி 165 ரன்கள் பின்தங்கியதால், பாலோ ஆன் பெற்றது.

மீண்டும் களமிறங்கி இந்திய மகளிர் அணியில் மந்தனா 8 (13) ரன்கள் சேர்த்து ஆட்டமிழந்தார். தற்போது ஷபாலி 55* (68), தீப்தி ஷர்மா 18* (66) களத்தில் இருக்கிறார்கள். மூன்றாவது நாள் ஆட்டம் நிறைவடைந்துள்ளது.

இப்போட்டியில், 17 வயதான ஷபாலி வர்மா இரண்டு இன்னிங்ஸ்களிலும் (96, 55) அரை சதம் அடித்து உலகம் முழுவதும் கவனம் பெற்றுள்ளார். இளம் வயதிலேயே நேர்த்தியான ஆட்டத்தை வெளிப்படுத்தி வருவதால் பிற்காலத்தில் மிகப்பெரிய கிரிக்கெட் நட்சத்திரமாக வருவார் எனக் கருதப்படுகிறது.

இந்நிலையில் இந்திய அணி பீல்டிங் கோச் ஸ்ரீதர், ஷபாலி வர்மாவை புகழ்ந்து பேசியுள்ளார். ”ஷாபாலி ஆட்டம் சேவாக்கை நினைவுபடுத்தியது. அவர் அதிக பந்துகளை ஆஃப் திசையில் அடித்து, கிட்டதட்ட சேவாக்கை போல்தான் செயல்பட்டார். முதல் இன்னிங்ஸில் சதமடிப்பார் என எதிர்பார்த்தோம். துரதிருஷ்டவசமாக அப்படி நடைபெறவில்லை. இரண்டாவது இன்னிங்ஸிலும் சிறப்பாக விளையாடி வருகிறார். இதில் சதமடிப்பார் என எதிர்பார்க்கிறேன்” எனத் தெரிவித்தார்.

“முதல் இன்னிங்ஸில் ஷபாலி, மந்தனா சிறப்பானத் துவக்கம் தந்தனர். இருப்பினும் மற்றவர்கள் நல்லமுறையில் சோபிக்காததால் பாளோ ஆன் பெற வேண்டிய நிலை ஏற்பட்டிருக்கிறது. இரண்டாவது இன்னிங்ஸில் சிறப்பாக விளையாடி வெற்றிபெற முயற்சிப்பார்கள் என நம்புகிறேன்” என்றார்.