அஷ்வினிடம் அகப்பட்ட நியூசி., : இந்திய அணிக்கு வலுவான முன்னிலை!

இந்தூர்: நியூசிலாந்து அணிக்கு எதிரான மூன்றாவது டெஸ்டில் இந்திய சுழல் சூறாவளி அஷ்வின் ஆறு விக்கெட் கைப்பற்ற, இந்திய அணி 258 ரன்கள் என்ற வலுவான முன்னிலை பெற்றது.

இந்தியா வந்துள்ள நியூசிலாந்து அணி, 3 டெஸ்ட் போட்டிகள் கொண்ட தொடரில் பங்கேற்கிறது. முதல் இரண்டு டெஸ்டிலும் இந்திய அணி வென்றது. இரு அணிகள் மோதும் மூன்றாவது டெஸ்ட் இந்தூரில் நடக்கிறது. கேப்டன் விராட் கோலி (211)இரட்டை சதம், ரகானே (188) சதம் கைகொடுக்க, இந்திய அணி முதல் இன்னிங்சில், 5 விக்கெட்டுக்கு 557 ரன்கள் எடுத்து ‘டிக்ளேர்’ செய்தது. இரண்டாவதுநாள் ஆட்டநேர முடிவில், நியூசிலாந்து அணி முதல் இன்னிங்சில், விக்கெட் இழப்பின்றி 28 ரன்கள் எடுத்திருந்தது. கப்டில் (17), லதாம் (6) அவுட்டாகாமல் இருந்தனர்.

இருவரும் அரைசதம்:
இன்றைய மூன்றாவது நாள் ஆட்டத்தை தொடர்ந்த நியூசிலாந்து அணிக்கு கப்டில், லதாம் ஜோடி நிதானமான துவக்கம் அளித்தது. இந்த ஜோடியை பிரிக்க கேப்டன் கோலி, அஷ்வின், ரவிந்திர ஜடேஜாவின் சுழற் தாக்குதலை பயன்படுத்தினார்.

இருவரும் அரைசதத்தை பதிவு செய்தனர். லதாம் 53 ரன்கள் எடுத்த போது அஷ்வின் சுழலில் அவரிடமே சிக்கினார். பின் வந்த கேப்டன் வில்லியம்சன் (8) போல்டானார். தொடர்ந்து வந்த டெய்லரையும், அஷ்வின் ‘டக் அவுட்டாக்கினார்’.

ராசியான கை:
பின் சில ஓவர்கள் இடைவேளையில், பவுலர் எண்டில் கப்டில் நிற்க, ரான்கி அடித்த பந்து அஷ்வினின் கையில்பட்டு ஸ்பெம்பில் பட்டது. அப்போது கப்டில் கிரீஸைவிட்டு வெளியே நிற்க, பறிதாபமாக அவுட்டானார்.

பின் அடுத்த ஓவரில் ரான்கி (0) அஷ்வினின் வளையிலேயே சிக்கினார்.
வாட்லிங் (23) ஜடேஜாவிடம் சிக்கினார். பின் வரிசை வீரர்கள் அனைவரும் அஷ்வினின் கையிலேயா அகப்பட, நியூசிலாந்து அணி, முதல் இன்னிங்சில் 299 ரன்களுக்கு ஆல் அவுட்டானது. இதையடுத்து இந்திய அணி, 258 ரன்கள் என்ற வலுவான் முன்னிலை பெற்றது.

மூன்றாவது நாள் தேநீர் இடைவேளைக்கு பின் இந்திய அணி, இரண்டாவது இன்னிங்சில் விக்கெட் இழப்பின்றி 4 ரன்கள் எடுத்து 262 ரன்கள் முன்னிலை பெற்றிருந்தது. விஜய் (4), காம்பிர் (0) அவுட்டாகாமல் இருந்தனர்.