இங்கிலாந்து தொடரில் இருந்து பும்ரா நீக்கம்

இங்கிலாந்து அணிக்கு எதிரான டி20 மற்றும் ஒருநாள் கிரிக்கெட் தொடர்களிலிருந்து இந்திய வேகப்பந்துவீச்சாளர் ஜஸ்ப்ரீத் பும்ரா காயம் காரணமாக நீக்கப்பட்டுள்ளார்.

இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு 3 டி20, 3 ஒருநாள் மற்றும் 5 டெஸ்ட் போட்டிகளில் விளையாட உள்ளது. இந்த நீண்ட தொடர் வரும் ஜூலை 3ஆம் தேதி தொடங்குகிறது.

இந்நிலையில் இந்திய அணியின் முன்னணி வேகப்பந்துவீச்சாளர் பும்ரா விரல்களில் ஏற்பட்ட எலும்புமுறிவு காரணமாக முதலில் நடைபெறும் டி20 மற்றும் ஒருநாள் போட்டிகளிலிருந்து நீக்கப்பட்டுள்ளார்.

காயத்திற்கு சிகிச்சை பெற அவர் உடனடியாக நாடு திரும்புகிறார். ஆகஸ்ட் 1ஆம் தேதி தொடங்கும் டெஸ்ட் தொடருக்கு முன் அவர் குணமடைந்து அணியில் இடம்பெற வாய்ப்புள்ளது.

அவருக்குப் பதிலாக ஷர்துல் தாகூர் அல்லது தீபக் சஹார் ஆகியோர் அணியில் சேர்க்கப்படலாம் என்று தெரிகிறது. இவர்கள் இருவரும் தற்போது இங்கிலாந்தில் சுற்றுப்பயணம் மேற்கொண்டு விளையாடும் இந்திய ஏ அணியில் இடம்பெற்றிருப்பது குறிப்பிடத்தக்கது.