நம்பர் 1 இடத்தை இந்தியாவிடமிருந்து பிடுங்கி கொள்வோம் - இன்ஜமம் உல் ஹக்

கராச்சி : டெஸ்ட் ரேங்கில் நம்பர் 1 என்ற இடத்தை பாகிஸ்தான் விரைவில் பிடுங்கி விடும் என முன்னாள் பாகிஸ்தான் கிரிக்கெட் கேப்டன் இன்ஜமம் உல் ஹக் தெரிவித்துள்ளார்.

இன்ஜமம் உல் ஹக் அளித்துள்ள பேட்டியில், “பாகிஸ்தானுடன் கடந்த 2007ம் ஆண்டு முதல் கிரிக்கெட் போட்டி தொடர்களில் பங்கேற்பதை இந்தியா தவிர்த்து வருகின்றது. இதுமிகவும் வருத்தமான விஷயம். நான் கேப்டனாக இருந்தபொழுது, இந்தியா மற்றும் பாகிஸ்தானில் நடந்த இந்தியாவுக்கு எதிரான போட்டிகளில் பங்கேற்றிருக்கின்றேன். இருமக்களின் மன உணர்வு எப்படி இருக்கும் என்று நன்கு அறிந்தவன் நான்.

இந்தியாவிடம் இருந்து டெஸ்ட் அரங்கில் நம்பர் 1 என்ற இடத்தை மிக விரைவில் பாகிஸ்தான் அணி பிடிங்கிக் கொள்ளும். பாகிஸ்தான் அணி சொந்த மண்ணில் விளையாடாமலேயே முதல் இடத்தை பிடித்தது. ஆனால் இந்திய அணியோ வெளிநாடுகளில் பங்கேற்கும் போட்டிகளில் பாகிஸ்தான் அணி பெற்ற வெற்றியை விட குறைவாகவே பெறுகின்றது. அதுமட்டுமல்லாமல் அடுத்த 13 டெஸ்ட் போட்டி இந்திய அணி அதன் சொந்த மண்ணில் விளையாட உள்ளது.

ஆனால் பாகிஸ்தான் அணியோ கடந்த 2009ம் ஆண்டு முதல் சொந்த மண்ணில் டெஸ்ட் போட்டியில் விளையாடியது இல்லை. இருப்பினும் நாங்கள் முதலிடத்தை பிடித்தோம், ஆனால் அதை இந்தியா பறித்து விட்டது.

எங்கள் அணியில் மிகத் திறமையான வீரர்கள் உள்ளனர். எங்களுக்கு ஒரு நாள் தொடர், டி20 தொடர்களில் விளையாடும் அளவிற்கான திறமையான இளம் வீரர்கள் வாய்த்துள்ளனர். அதனால் அதிலும் கலக்கி வருகின்றனர்.

விரைவில் இந்தியாவிடம் உள்ள நம்பர் 1 இடத்தை நாங்கள் தட்டி பறிப்போம்” என இன்ஜமம் உல் ஹக் தெரிவித்துள்ளார்.