CSK: ‘ஜேமிசனுக்கு மாற்று இவர்தான்?’…பென் ஸ்டோக்ஸுக்கு நிகரானவரை தட்டித்தூக்கும் தோனி...பலே திட்டம்!

ஐபிஎல் 16ஆவது சீசனுக்கான அட்டவணை சமீபத்தில் வெளியானது. அதன்படி போட்டிகள் மார்ச் 31ஆம் தேதி துவங்கி மே 28ஆம் தேதி முடிய உள்ளது. துவக்க போட்டியும், பைனலும் அகமதாபாத் மைதானத்தில் நடைபெறும் எனவும் அறிவிக்கப்பட்டுள்ளது.

ஹோம் கிரோண்டில்:

கொரோனா காரணமாக கடந்த இரண்டு சீசன்களில் அணிகள், தங்களது ஹோம் கிரோண்டில் விளையாட முடியாத நிலை இருந்தது. இந்நிலையில், இந்தாண்டில் அனைத்து அணிகளும் தங்களது ஹோம் கிரோண்டில் விளையாடலாம் என அறிவிக்கப்பட்டுள்ளது. இது சிஎஸ்கே ரசிகர்களுக்கு கூடுதல் மகிழ்ச்சியை ஏற்படுத்தும் வகையில் இருக்கிறது.

ரசிகர்கள் நம்பிக்கை:

கேப்டன் மகேந்திரசிங் தோனி தனது கடைசிப் போட்டியை சென்னை சேப்பாக்கத்தில் விளையாடுவேன் எனக் கூறியிருந்தார். அதன்படி இந்தாண்டு கோப்பையை வென்றுகொடுத்துவிட்டு, சென்னையில் ஓய்வு அறிவிப்பை வெளியிடுவார் என ரசிகர்கள் நம்பிக்கையுடன் இருக்கிறார்கள். இதற்காக, சிஎஸ்கே வீரர்களும் அடுத்த மாதத்தில் இருந்து பயிற்சி முகாமை துவங்க உள்ளனர்.

ஜேமிசன் விலகல்:

இந்நிலையில், சிஎஸ்கேவுக்கு பெரும் பின்னடைவை ஏற்படுத்தும் வகையில் ஒரு செய்தி வெளியாகியுள்ளது. ஆம், சிஎஸ்கேவின் வேகப்பந்து வீச்சாளர், நியூசிலாந்து வீரர் கைல் ஜேமிசன் ஐபிஎல் 16ஆவது சீசனில் இருந்து விலகுவதாக அறிவித்துள்ளார். ஜேமிசனுக்கு கடந்த சில மாதங்களாகவே முதுகு வலி பிரச்சினை இருந்து வருகிறது. அதற்காக அவர் தற்போது அறுவை சிகிச்சை செய்ய உள்ளார். இந்த அறுவை சிகிச்சைக்கு பிறகு 4 மாதங்கள் வரை ஓய்வில் இருக்க வேண்டிய நிலை இருக்கிறது.

இதனால்தான், ஜேமிசன் ஐபிஎல் 16ஆவது சீசனில் இருந்து விலகியுள்ளார். ஏற்கனவே, கடந்த ஆண்டில் தீபக் சஹார் விலகியதால், சிஎஸ்கே கடும் பின்னடைவை சந்தித்திருந்தது. தற்போது, தீபக் சஹார் சரியான பார்மில் இருக்கிறாரா என்றே தெரியவில்லை.

பின்னடைவு:

சென்னை சேப்பாக்கம் மைதானத்தில், உயர்ந்த பௌலர்கள் அதிகம் தாக்கத்தை ஏற்படுத்த முடியும் என்பதால்தான், ஜேமிசனை சிஎஸ்கே வாங்கியது. இந்நிலையில், அவர் விலகியிருப்பதும், தீபக் சஹார் சரியான பார்மில் இருக்கிறாரா என்பது தெரியவில்லை என்பதாலும், இந்த விஷயம் சிஎஸ்கேவுக்கு நிச்சயம் பின்னடைவான விஷயம்தான்.

தஷுன் ஷனகா வாங்க வாய்ப்பு?

கைல் ஜேமிசனுக்கு மாற்றாக வெளிநாட்டு பௌலரை வாங்க சிஎஸ்கேவால் முடியும். இந்நிலையில், இலங்கை அணிக் கேப்டன், வேகப்பந்து வீச்சு ஆல்-ரவுண்டர் தஷுன் ஷனகாவுடன் சிஎஸ்கே பேச்சு வார்த்தையில் இருப்பதாக தகவல் வெளியாகியுள்ளது.

தோனிதான், ஷனகாவை வாங்க வேண்டும் என முடிவெடுத்துள்ளதாகவும் கூறப்படுகிறது. ஷனகா சமீபத்தில் இந்திய சுற்றுப் பயணத்தின்போது தொடர்ந்து அபாரமாக பேட்டிங் செய்து, பினிஷராக செயல்பட்டார். அதேபோல், பந்துவீச்சிலும் சிறப்பாக செயல்பட்டார் என்பது குறிப்பிடத்தக்கது.