பாகிஸ்தானை வீழ்த்தி சரித்திரம் படைக்குமா அயர்லாந்து?

அயர்லாந்து அணி, தனது முதலாவது டெஸ்ட் போட்டியில், பாகிஸ்தானுக்கு 160 ரன்களை வெற்றி இலக்காக நிர்ணயித்துள்ளது.

ஐசிசி, கடந்த ஆண்டு அயர்லாந்து மற்றும் ஆப்கானிஸ்தான் ஆகிய இரு அணிகளுக்கு டெஸ்ட் போட்டிகளுக்கான அந்தஸ்தை வழங்கியது. இதன்மூலம், சர்வதேச டெஸ்ட் போட்டிகளில் பங்கேற்கும் தகுதியை இவ்விரு அணிகளும் பெற்றன.

இதையடுத்து, கடந்த 11 ஆம் தேதி டப்ளினில் தொடங்கிய முதலாவது டெஸ்ட் போட்டியில் அயர்லாந்து அணி, பாகிஸ்தான் அணியை எதிர்கொண்டது. இதில், முதல் நாள் ஆட்டம் மழை காரணமாக தடைப்பட்டது.

இதைத் தொடர்ந்து நடைபெற்ற இரண்டாம் நாள் ஆட்டத்தில், அயர்லாந்து அணி டாஸ் வென்று பந்துவீச்சைத் தேர்வு செய்தது. இதன்பின் களமிறங்கிய பாகிஸ்தான் அணி, தனது முதல் இன்னிங்ஸில் 9 விக்கெட்கள் இழப்பிற்கு 310 ரன்கள் குவித்து டிக்ளேர் செய்தது. பாகிஸ்தான் அணியில் அதிகபட்சமாக பாஹீம் அஷரப் 83 ரன்களையும், அசாத் சபீக் 62 ரன்களையும் குவித்தனர்.

பின்னர், தனது முதல் இன்னிங்ஸை தொடங்கிய அயர்லாந்து அணியில் கெவின் ஓ பிரைன் மட்டும் 40 ரன்கள் குவிக்க மற்ற வீரர்கள் சொற்ப ரன்களில் அவுட்டாகி வெளியேறினர். இதனால் 130 ரன்களுக்கு அனைத்து விக்கெட்களையும் இழந்து, பாலோ-அன் ஆனது.

இதன்பின் சுதாரித்துக்கொண்ட அயர்லாந்து அணி, பொறுமையான ஆட்டத்தை வெளிப்படுத்தியது. இரண்டாவது இன்னிங்ஸில் சிறப்பாக விளையாடிய கெவின் ஓ பிரைன் 118 ரன்கள் குவித்து அவுட்டானார். இறுதியாக, அயர்லாந்து அணிஇரண்டாவது இன்னிங்ஸில் அனைத்து விக்கெட்களையும் இழந்து 339 ரன்களை குவித்தது.

இந்நிலையில், 160 ரன்கள் எடுத்தால் வெற்றி என்ற இலக்குடன் பாகிஸ்தான் அணி தனது இரண்டாவது இன்னிங்ஸைத் தொடங்கியுள்ளது. இன்று கடைசி நாள் ஆட்டம் என்பதால், இரு அணிகளும் வெற்றி பெறும் முனைப்போடு விளையாடி வருகின்றன.