IPL T20: முதல் ஆளாக அமீரகத்தில் கால்வைத்த கிங்ஸ் லெவன் பஞ்சாப்

கிங்ஸ் லெவன் பஞ்சாப் அணியின் வேகப்பந்து வீச்சாளர் முகமது ஷமி, தனது இன்ஸ்டாகிரம் பக்கத்தில் ஒரு புகைப்படத்தை பகிர்ந்துள்ளார். அதில், “நாங்கள் துபாய்க்குப் புறப்பட்டுவிட்டோம்” எனவும் பதிவுசெய்துள்ளார். ராஜஸ்தான் ராயல்ஸ் அணியும் இன்று துபாய்க்குப் பறக்க உள்ளது என அந்த அணியின் உரிமையாளர் தனது இன்ஸ்டாகிராம் பக்கத்தின் பதிவு செய்துள்ளார்.

சென்னை சூப்பர் கிங்ஸ் அணி வருகிற ஆகஸ்ட் 21ஆம் தேதி துபாய் பயணம் மேற்கொள்ளும் என்று அணியின் தலைமை அதிகாரி காசி விஸ்வநாதன் உறுதிப்படுத்தியுள்ளார்.

ஐபிஎல் 13ஆவது சீசன் கொரோனா காரணமாக ஐக்கிய அரபு அமீரகத்திற்கு இடம் மாறியது. துபாய், ஷார்ஜா, அபுதாபி ஆகிய இடங்களில் நடைபெறவுள்ள ஐபிஎல் தொடர் மொத்தம் 53 நாட்கள் நடக்க உள்ளது. செப்டம்பர் 19-ல் தொடங்கி நவம்பர் 10-ல் முடியும் என்று தெரிவிக்கப்பட்டது. ஐபிஎல் வரலாற்றில் முதன்முதலில் இறுதிப் போட்டியானது ஞாயிறுக் கிழமைக்குப் பதில் செவ்வாய்க் கிழமை நடைபெறும் என்று அறிவிக்கப்பட்டது.

மதியம் மற்றும் மாலை வேளைகளில் நடைபெற உள்ள போட்டிகள் வழக்கத்தை விட 1:30 மணி நேரம் முன்கூட்டியே தொடங்க உள்ளது. பிசிசிஐ வெளியிட்ட அறிக்கையில், “ஐபிஎல் 13ஆவது சீசன் செப்டம்பர் 19-ல் தொடங்கி நவம்பர் 10-ல் முடியும். மொத்தம் 53 நாட்கள் நடைபெற உள்ள போட்டியில், 10 போட்டிகள் மதிய வேளையில் நடத்தத் திட்டமிடப்பட்டுள்ளது. மதியம் மற்றும் மாலையில் நடைபெறும் போட்டிகள் வழக்கத்தைவிட 1:30 மணி நேரம் முன்கூட்டியே தொடங்கப்படும்” என்று தெரிவிக்கப்பட்டிருந்தது.

பிசிசிஐ ஐபிஎல் அறிவிப்பை வெளியிட்டதற்குப் பின்பு, சீன உடன் எல்லைப் பிரச்சனை நடைபெற்றது. அதனால், ஐபிஎல் தொடருக்குச் சீன நிறுவனத்தின் ஸ்பான்சரை தடை செய்ய வேண்டும் என நாட்டு மக்கள் சமூக வலைத்தளங்கள் மூலம் கோரிக்கை வைத்தனர். இதனை ஏற்றுக் கொண்ட பிசிசிஐ, சீன நிறுவனத்தின் ஸ்பான்சரை நிறுத்தியது.

இருப்பினும், புதிய ஸ்பான்சரை தேர்வு செய்ய இழுபறிகள் நீடித்தது. பதஞ்சலி, டாடா போன்ற நிறுவனங்கள் டைட்டில் ஸ்பான்சராக வரும் என்று செய்திகள் பரவின. இருப்பினும், இந்திய விளையாட்டுத் துறையில் பிரபலமாக இருக்கும் டிரீம் 11 டைட்டில் ஸ்பான்சராக தேர்வு செய்யப்பட்டது. மேலும் பைஜூ மற்றும் அன்அகடாமி நிறுவனங்கள் பார்ட்னர்களாக தேர்வு செய்யப்பட்டன என்பது குறிப்பிடத்தக்கது.