இலங்கை சுற்றுப் பயணம்: இந்திய XI அணியில் இவர்களுக்குத்தான் இடம்…முன்னாள் வீரர் கணிப்பு!

விராட் கோலி, ஜஸ்பரீத் பும்ரா, ரவீந்திர ஜடேஜா போன்ற முன்னணி வீரர்களை கொண்ட இந்திய அணி இங்கிலாந்து சுற்றுப் பயணத்தில் பங்கேற்கும் அதேவேளையில், ஐபிஎலில் சிறப்பாக சோபித்த இளம் வீரர்கள் அடங்கிய இந்திய அணி இலங்கை சுற்றுப் பயணத்தில் பங்கேற்று மூன்று போட்டிகள் கொண்ட ஒருநாள், ஐந்து போட்டிகள் கொண்ட டி20 தொடரில் பங்கேற்று விளையாடவுள்ளது.

இந்நிலையில் இலங்கை அணிக்கு எதிராக களமிறங்கப் போகும் XI அணியில் யார் யாருக்கு இடம் கிடைக்கும் என்ற கேள்வி தற்போது எழுந்துள்ளது. இதுதொடர்பான கணிப்பு முன்னாள் வீரர் மஞ்சுரேக்கர் தற்போது வெளியிட்டுள்ளார்.

இதுகுறித்து விரிவாகப் பேசிய அவர், “இலங்கை சுற்றுப் பயணத்தில் அதிகளவில் இளம் வீரர்கள் இடம்பெறவுள்ளனர். மகிழ்ச்சியான செய்தி. இதன்மூலம் அவர்களுக்கு நிறைய அனுபவங்கள் கிடைக்கும். இந்நிலையில் இலங்கைக்கு எதிராகக் களமிறங்கப் போகும் XI அணியில் யார் யாருக்கு இடம் கிடைக்கப்போகிறது என்பதை அறிய ரசிகர்கள் ஆவலோடு காத்திருக்கிறார்கள். இவர்களுக்காக எனது கணிப்பை வெளியிடுகிறேன்” எனத் தெரிவித்தார்.

“துவக்க வீரர்களாக டெல்லி கேபிடல்ஸ் அணி ஓபனர்கள் ஷிகர் தவன், பிரித்வி ஷாவை தேர்வு செய்ய விரும்புகிறேன். இந்த சீசனில் இருவரும் பட்டையக் கிளப்பினார்கள். 3 மற்றும் 4ஆவது இடத்தில் மும்பை இந்தியன்ஸ் வீரர்கள் இஷான் கிஷன், சூர்யகுமார் யாதவை களமிறக்கினால் நன்றாக இருக்கும். 5ஆவது இடம் மனிஷ் பாண்டேவுக்கு ஒதுக்கப்படுகிறது” எனக் கூறினார்.

மேலும் பேசிய மஞ்சுரேக்கர், “ஹார்திக் பாண்டியா பந்துவீசவில்லை என்றாலும் சிறப்பாக பேட்டிங், பீல்டிங் செய்யக் கூடியவர். அவரை 6ஆவது இடத்தில் களமிறக்கலாம், தவறில்லை. ஆல்-ரவுண்டருக்கான இடத்திற்கு ராகுல் தேவத்தியா பொருத்தமாக இருப்பார். வேகப்பந்து வீச்சைப் பொருத்தவரை இளம் வீரர்கள் சேத்தன் சகர்யா, தீபக் சாஹர் ஆகியோரை தேர்வு செய்ய விரும்புகிறேன். ராகுல் சாஹர் ஐபிஎல் 14ஆவது சீசனில் சிறப்பாகச் செயல்பட்டார். இவர்தான் எனது கனவு அணியின் மெயன் ஸ்பின்னர். பந்துவீச்சாளர்களை வழிநடத்தும் பொறுப்பு புவனேஷ்வர் குமாருக்கு வழங்கப்படுகிறது. இவர்கள்தான் என்னுடைய XI அணி” எனத் தெரிவித்தார்.

மஞ்சுரேக்கரின் இந்திய XI அணி: ஷிகர் தவன், பிரித்வி ஷா, சூர்யகுமார் யாதவ், இஷான் கிஷன், மனிஷ் பாண்டே, ஹார்திக் பாண்டியா, ராகுல் தேவத்தியா, சேத்தன் சகார்யா, ராகுல் சாஹர், தீபக் சாஹர், புவனேஷ்வர் குமார்.