இந்தியா-பாக்., கிரிக்கெட்: தர்மசாலா இடம் மாற்றமா?

இந்தியா, பாகிஸ்தான் இடையே மார்ச் 19ஆம் தேதி நடக்கும் டி-20 கிரிக்கெட் தளத்தை வேறு இடத்திற்கு மாற்றுமாறு இமாச்சலப்பிரதேச மாநிலம் பிசிசிஐ-யை கேட்டுக் கொண்டு இருப்பதால், இந்தப் போட்டியில் பாகிஸ்தான் பங்கேற்குமா என்ற சந்தேகம் எழுந்துள்ளது.

போட்டி நடைபெறும் தர்மசாலாவில் பாதுகாப்புக் குறைபாடு காரணமாக போட்டி நடத்துவதில் சிக்கல் இருந்தால் இந்தப் போட்டியை மொஹாலி அல்லது கொல்கத்தாவிற்கு மாற்றுமாறு ஐசிசி-க்கு கடிதம் எழுதி இருப்பதாக பாகிஸ்தான் கிரிக்கெட் கழகம் தலைவர் ஷர்யார் கான் தெரிவித்துள்ளார்.

இந்நிலையில் இன்று இதுசம்பந்தமாக பத்திரிக்கையாளர்களை பாகிஸ்தான் கிரிக்கெட் வாரியம் சந்திக்கலாம் என்ற தகவல் வெளியாகியுள்ளது. Pakistan Cricket Board likely to address media today over participation in ICC #WorldT20— ANI (@ANI_news) March 9, 2016 இதுதொடர்பாக பாகிஸ்தான் நாட்டின் டான் பத்திரிகையில் வெளியான செய்தியில், ''பாதுகாப்பு குறைபாடுகள் காரணமாக பாகிஸ்தான் வீரர்கள் புறப்படுவதில் தாமதம் ஏற்பட்டுள்ளது'' என்று தெரிவிக்கப்பட்டுள்ளது.

மேலும், ''போட்டி நடக்கும் தர்மசாலா வந்து சென்ற பாகிஸ்தான் பாதுகாப்புக் கமிட்டிக்கு போதிய தகவல்கள் கிடைக்கவில்லை. இந்திய அரசு கொடுத்து இருக்கும் பாதுகாப்பு உறுதியையும் கடந்து, இமாசலப்பிரதேச அரசு போட்டி நடக்கும் இடத்தில் போதிய பாதுகாப்பு உத்தரவாதத்தையோ, வசதியையோ ஏற்படுத்தவில்லை. உள்துறை அமைச்சகத்துடன் ஆலோசித்த பின்னர் எப்போது பாகிஸ்தான் கிரிக்கெட் குழுவினர் இந்தியா செல்வார்கள் என்பது முடிவு செய்யப்படும்'' என்று தெரிவிக்கப்பட்டுள்ளது.