பவுண்சரால் மயங்கி விழுந்த முஷ்பிகுர்: 40 நிமிடத்துக்கு பின் மருத்துவமனை சென்ற பரிதாபம்!

புலோஎம்பான்டென்: தென் ஆப்ரிக்க அணிக்கு எதிரான இரண்டாவது டெஸ்டில், பவுண்சர் தலையில் பலமாக தாக்கியதால் வங்கதேச வீரர் முஷ்பிகுர் மயங்கி விழுந்தார்.

தென் ஆப்ரிக்கா சென்றுள்ள வங்கதேச அணி, முதலில் 2 டெஸ்டில் பங்கேற்கிறது. முதல் டெஸ்டில் தென் ஆப்ரிக்க அணி 333 ரன்கள் வித்தியாசத்தில் வென்றது. இரு அணிகள் மோதும் இரண்டாவது டெஸ்ட் போட்டி, புலோஎம்பான்டெனில் நடக்கிறது.

இதில் தென் ஆப்ரிக்க அணி, முதல் இன்னிங்சில், 4 விக்கெட்டுக்கு 573 ரன்கள் குவித்து டிக்ளேர் செய்தது. பின் களமிறங்கிய வங்கதேச அணி, முதல் இன்னிங்சில் 147 ரன்களுக்கு ஆல் அவுட்டாகி பாளோ ஆன் பெற்றது.

பின் இரண்டாவது இன்னிங்சை தொடந்த வங்கதேச அணி, இரண்டாவது நாள் ஆட்டநேர முடிவில், விக்கெட் இழப்பின்றி 7 ரன்கள் எடுத்திருந்தது. இன்றைய மூன்றாவது நாள் ஆட்டத்தில், இரண்டாவது இன்னிங்சை தொடர்ந்த வங்கதேச அணி, அடுத்ததடுத்து விக்கெட்டை இழந்தது.

’பாளோ ஆன்’:
இந்நிலையில் அந்த அணியின் கேப்டன் முஷ்பிகுர் ரஹீம், 11 ரன்கள் எடுத்த போது, போட்டியின் 14வது ஓவரை தென் ஆப்ரிக்க வீரர் ஆலிவர் வீசினார். இந்த ஓவரின் 2வது பந்தை ஆலிவர் பவுண்சராக வீச, அது முஷ்பிகுர் அணிந்திருந்த ஹெல்மெட்டின் இடது பக்கத்தில் பலமாக தாக்கியது.

மனிதாபிமானம்:
இதையடுத்து சிறிது நேரம் தடுமாறிய முஷ்பிகுர், அப்படியே லெக் சைடு சென்று சாய்ந்தார். உடனடியாக, வங்கதேச பிசியோதெரபிஸ்ட் மைதானத்துக்குள் ஓடி வந்தார். வங்கதேச அணியில் எந்த மருத்துவரும் இல்லாத காரணத்தினால் தென் ஆப்ரிக்க அணி மருத்துவர் வந்து முஷ்பிகுரை சோதனை செய்தார்.

பின் மெதுவாக இயல்பு நிலைக்கு வந்த முஷ்பிகுருக்கு மருத்துவமனைக்கு செல்லும்படி தென் ஆப்ரிக்க மருத்துவர் ஆலோசனை வழங்கினார். ஆனால், முஷ்பிகுர் தொடர்ந்து விளையாட வேண்டும் என பிடிவாதமாக போட்டியை தொடர்ந்தார்.

தொடர்ந்து விளையாடிய போதும், அவர் தடுமாறியபடியே இருந்தார். பின் ரஹீம் 26 ரன்கள் எடுத்தபோது அவுட்டானார். இதன் பின் முஷ்பிகுர் மருத்துவமனைக்கு அழைத்துச்செல்லப்பட்டார். முன்னதாக கடந்த ஜனவரி மாதம் நியூசிலாந்துக்கு எதிரான டெஸ்டில் பங்கேற்ற போது இதே போல பவுண்சர் தாக்கி, உடனடியாக முஷ்பிகுர் மருத்துவமனையில் அனுமதிக்கப்பட்டார்.

இப்போட்டியின் இரண்டாவது இன்னிங்சிலும், வங்கதேச அணி, 172 ரன்களுக்கு ஆல் அவுட்டானது. இதன்மூலம் தென் ஆப்ரிக்க அணி, ஒரு இன்னிங்ஸ் 254 ரன்கள் வித்தியாசத்தில், வெற்றி பெற்று, டெஸ்ட் தொடரை 2-0 என கைப்பற்றியது.