‘நடராஜன் தரமான வீரர், ஆனா டெஸ்ட்ல எப்டினு தெரியாது’: வார்னர் ஓபன் டாக்!

ஆஸ்திரேலிய அணிக்கு எதிரான கிரிக்கெட் தொடர்களில் பங்கேற்கும் இந்திய அணி அறிவிக்கப்பட்டபோது நடராஜனின் பெயர் காத்திருப்பு பட்டியலில் மட்டுமே இருந்தது. வருண் சக்ரவர்த்தி காயம் காரணமாக விலகியதால் நடராஜன் டி20 அணியில் சேர்க்கப்பட்டார். அதன்பிறகு ஒருநாள் அணியிலும் இடம் கிடைத்தது. அத்தருணங்களில் டேவிட் வார்னர் நடராஜனுக்கு வாழ்த்துக்கள் தெரிவித்து ட்வீட் வெளியிட்டார். இந்நிலையில், தற்போது டெஸ்ட் அணியில் நடராஜன் இணைந்திருப்பது குறித்தும் டேவிட் வார்னர் பேசியுள்ளார்.

தனியார் பத்திரிகை ஒன்றுக்குப் பேட்டியளித்த அவர், “நடராஜன் டெஸ்ட் போட்டிகளில் சிறப்பாக விளையாடுவாரா? என்பது குறித்து எனக்குத் தெரியாது. ரஞ்சிக் கோப்பையில் அவரின் செயல்பாடு உங்களுக்கு வேண்டுமானால் (இந்திய பத்திரிகையாளரை நோக்கி) தெரிந்திருக்கலாம். ஐபிஎலில் சரியான லென்த்தில் பந்துவீசினார். ஆனால், டெஸ்ட் போட்டிகளில் அவ்வாறு வீசுவாரா? என்பதை 100 சதவீதம் சரியாக கூறமுடியாது” எனத் தெரிவித்தார்.

ஆஸ்திரேலிய அணிக்கு எதிரான இரண்டாவது டெஸ்ட் போட்டியின் இரண்டாவது இன்னிங்ஸில் உமேஷ் யாதவ் காயம் காரணமாக அவதிப்பட்டதால் உடனே பெவிலியன் திரும்பினார். அதன்பிறகு களத்திற்குத் திரும்பவில்லை. தற்போதுவரை காயத்தில் தீவிரம் குறையாத காரணத்தினால் நடராஜன் மாற்று வீரராகச் சேர்க்கப்பட்டுள்ளார். மேலும், முதல் டெஸ்டின்போது காயத்தை எதிர்கொண்ட முகமது ஷமிக்குப் பதிலாக ஷல்தூல் தாகூர் சேர்க்கப்பட்டுள்ளார். இதனால், மூன்றாவது டெஸ்டில் நவ்தீப் சைனி, தாகூர், நடராஜன் இவர்களில் ஒருவர் XI அணியில் களமிறங்குவது உறுதியாகியுள்ளது.

பிசிசிஐ தலைவர் கங்குலிக்கு திடீர் நெஞ்சு வலி; மருத்துவமனையில் அவசர அனுமதி!

“முகமது சிராஜ் ரஞ்சிக் கோப்பையில் சிறப்பாக விளையாடியது குறித்து ஓரளவுக்கு மட்டுமே எனக்குத் தெரியும். அவர் தற்போது அறிமுக டெஸ்ட் போட்டியில் சிறப்பாக விளையாடினார். நடராஜனும் அறிமுகப் போட்டியில் அசத்துவார் என நம்புகிறேன்”.

“அவர் சிறந்த பௌலர். சன் ரைசர்ஸ் அணிக் கேப்டனாக இருந்தபோது அருகிலிருந்து பார்த்துள்ளேன். நடராஜனுக்கு எனது வாழ்த்துக்கள். ஒருவேளை களமிறங்க வாய்ப்பு கிடைத்தால், சூழ்நிலையைச் சமாளித்து எப்படி விளையாட வேண்டும் என அவருக்குத் தெரியும்” என டேவிட் வார்னர் தெரிவித்தார்.