வரலாற்றில் இன்று: விடைபெற்ற கிரிக்கெட் லெஜண்ட்..அதேநாளில் உருவான மற்றொரு ஜாம்பவான்..சச்சின்!

கிரிக்கெட் வரலாற்றில் இதே தினத்தில் ஒரு ஜாம்பவான் ஓய்வு பெற்ற நிலையில், மற்றொரு ஜாம்பவான் வீரர் தனது கிரிக்கெட் வாழ்க்கையை வெற்றிகரமாகத் துவங்கியுள்ளார். இரண்டும் ஒரே நாளில் நடைபெற்றதை, பலர் இணையத்தில் பகிர்ந்து ஆச்சரியத்தை வெளிப்படுத்தி வருகின்றனர்.

1948:

1948ஆம் ஆண்டு ஆகஸ்ட் 14ஆம் தேதி இங்கிலாந்து, ஆஸ்திரேலியா இடையிலான கிரிக்கெட் போட்டி ஓவல் மைதானத்தில் நடைபெற்றது. இதில் முதலில் களமிறங்கிய இங்கிலாந்து அணி வெறும் 52 ரன்கள் மட்டும் அடித்து ஆல்-அவுட் ஆனது. இதனைத் தொடர்ந்து ஆஸ்திரேலிய அணி களமிறங்கியது. பார்வையாளர்கள் அனைவரும் இருக்கையின் நுனியில் அமர துவங்கினர். காரணம் டான் பிராட் மேன்தான்.

பிராட் மேன் டெஸ்ட் கிரிக்கெட்டில் 100 சராசரியுடன் 7000 ரன்களை கடக்க இன்னும் 4 ரன்கள் மட்டுமே தேவை. இவர், எப்போதுமே பெரிய ஸ்கோர் அடிக்க கூடியவர் என்பதால் 4 ரன்களை சுலபமாக எடுத்துவிடுவார் எனக் கருதப்பட்டது. ஆனால், அப்படி நடக்கவில்லை. பிராட் மேன் டக்-அவுட் ஆகி பெவிலியன் திரும்பினார். இப்போட்டியில், இங்கிலாந்து அணி இன்னிங்ஸ் தோல்வியைப் பெற்றதால், பிராட் மேனால் மீண்டும் களமிறங்க முடியவில்லை. இதில் சுவாரசியமாக விஷயம் என்னவென்றால், பிராட் மேனுக்கு இதுதான் கடைசி டெஸ்ட். இந்த டெஸ்டுடன் அவர் விடைபெற்று விட்டார். இன்றுவரை, இவரது சராசரியான 99.9-யை யாரும் கிட்டக்கூட நெருங்க முடியவில்லை என்பது குறிப்பிடத்தக்கது.

1990:

1990ஆம் ஆண்டில் இந்தியா, இங்கிலாந்து இடையிலான டெஸ்ட் போட்டி நடைபெற்றது. இதில் 17 வயதான சச்சின் கலந்துகொண்டு, தனது முதல் சதத்தை விளாசி உலக அளவில் கவனம் பெற்றார். இந்த சதத்தை அடித்தளமாகப் பயன்படுத்திக்கொண்ட சச்சின் அதன்பிறகு எண்ணற்ற சாதனைகளைப் படைத்து அசத்தினார். ஒருநாள் கிரிக்கெட்டில் முதல் இரட்டை சதம் அடித்த வீரராகத் திகழ்கிறார். இவர் சர்வதேச கிரிக்கெட்டில் மொத்தம் 34,357 ரன்கள் அடித்துள்ளார். பல ஜாம்பவான் பேட்ஸ்மேன்கள் 20,000 ரன்களை எடுப்பதற்கே திக்கித் திணறி வருகின்றனர் என்பது குறிப்பிடத்தக்கது.

ஒருபக்கம் ஜாம்பவான் பேட்ஸ்மேன் விடைபெற்ற அதே நாளில், மற்றொரு ஜாம்பவான் பேட்ஸ்மேன் தனக்கான அடித்தளத்தை உருவாக்கிய இத்தினத்தை ரசிகர்கள் இணையத்தில் பகிர்ந்து, இதனை வைரலாக்கி வருகின்றனர்.