பொறுப்பில்லாத இந்தியா, பொளந்துகட்டிய பாகிஸ்தான் : ’கப்’ கனவு அம்போ!

லண்டன்: பாகிஸ்தான் அணிக்கு எதிரான சாம்பியன்ஸ் டிராபி தொடரின் பைனலில், பேட்டிங், பவுலிங், என அனைத்திலும் சொதப்பிய இந்திய அணி, படுமோசமாக 180 ரன்கள் வித்தியாசத்தில் தோல்வியை சந்தித்தது.

இங்கிலாந்தில் மினி உலகக்கோப்பை என கருதப்படும், சாம்பியன்ஸ் டிராபி கிரிக்கெட் தொடர் நடந்தது. இதில் லண்டனில் நடந்த பைனலில், இந்திய அணி, தனது பரம எதிரியான பாகிஸ்தானை எதிர்கொண்டது. இதில் ‘டாஸ்’ வென்ற இந்திய அணி கேப்டன் விராட் கோலி முதலில் ’பீல்டிங்’ தேர்வு செய்தார். இரு அணியிலும் எந்த மாற்றமும் செய்யப்படவில்லை.

சொதப்பிய பும்ரா:
இதையடுத்து களமிறங்கிய பாகிஸ்தான் அணிக்கு, அசார் அலி (59), பஹார் (114), பாபர் (46), ஹபீஸ் (57*) ஆகியோர் கைகொடுக்க, பாகிஸ்தான் அணி, 50 ஓவரில் 4 விக்கெட்டுக்கு, 338 ரன்கள் குவித்தது. இதன் மூலம் சாம்பியன்ஸ் டிராபி அரங்கில் அதிகரன்கள் சேர்த்த அணி என்ற பெருமை பெற்றது பாகிஸ்தான்.

இந்திய அணி சார்பில் புவனேஷ்வர், பாண்டியா, ஜாதவ் ஆகியோர் தலா 1 விக்கெட் வீழ்த்தினார்.

ரோகித் ‘0’:
இமாலய இலக்கை துரத்திய இந்திய அணிக்கு துவக்க வீரர் ரோகித் ‘டக்’ அவுட்டாகி, அதிர்ச்சி அளித்தார். மற்றொரு துவக்க வீரர் தவான் (21) நீண்ட நேரம் தாக்குபிடிக்கவில்லை. தொடர்ந்து வந்த கோலி (5) சொதப்பலாக வெளியேறினார்.

தொடர்ந்து வந்த யுவராஜ் (22), தோனி (4) கேதர் ஜாதவ் (9) என ஒருவரும் தாக்குபிடிக்கவில்லை. ஒரு முனையில் விக்கெட் சரிந்தாலும், மறுமுனையில் மனம் தளராமல் விளையாடிய பாண்டியா, ஐசிசி., தொடரின் பைனலில், அதிவேக அரைசதம் அடித்து அசத்தினார்.

பின் வரிசை வீரர்கள் சொதப்ப, இந்திய அணி, ஓவரில் 158 ரன்களுக்கு ஆல் அவுட்டாகி, 180 ரன்கள் வித்தியாசத்தில் தோல்வியை சந்தித்தது. பாகிஸ்தான் சார்பில் அதிகபட்சமாக, முகமது அமீர் 3 விக்கெட் சாய்த்தார்.

இதன் மூலம் சாம்பியன்ஸ் டிராபி அரங்கில், பாகிஸ்தான் அணி, தனது பரமஎதிரியான இந்திய அணியை, லீக் போட்டியின் தோல்விக்கு பழிதீர்த்து முதல் முறையாக சாம்பியன் பட்டம் வென்றது.