ஜூனியர் உலகக்கோப்பையை வென்ற இந்திய அணிக்கு பிரதமர் மோடி வாழ்த்து!!

நியூசிலாந்தில் நடைபெற்ற ஜுனியர் உலகக்கோப்பையை வென்ற இந்திய அணிக்கு பிரதமர் ட்விட்டரில் தனது வாழ்த்துகளை தெரிவித்துள்ளார்.

நியூசிலாந்தில் நடைபெற்ற 19 வயதுக்கு உட்பட்டோருக்கான ஜூனியர் உலகக் கோப்பை கிரிக்கெட் தொடரின் இறுதிப்போட்டியில் இன்று இந்தியா – ஆஸ்திரேலியா அணிகள் மோதின.

இதில் முதலில் களமிறங்கிய ஆஸ்திரேலிய அணி 47.2 ஓவர்களில் அனைத்து விக்கெட்டுகளையும் இழந்து 216 ரன்கள் மட்டும் எடுத்தது. இதனையடுத்து களமிறங்கிய இந்திய அணி இரண்டு விக்கெட்டுகளை மட்டுமே இழந்து 38.5 ஓவர்களில் இலக்கை எட்டியது.

இதன்மூலம் நான்காவது முறையாக ஜூனியர் உலகக்கோப்பையை வென்று இந்திய அணி சாதனைப் படைத்தது. அதிரடியாக ஆடி சதம் விளாசிய இந்திய அணியின் தொடக்க வீரர் மன்ஜோத் கல்ரா (101*) ஆட்டநாயகன் விருதையும் சுப்மன் கில் தொடர் நாயகன் விருதையும் பெற்றனர்.

இந்நிலையில், இந்த வெற்றி குறித்து பிரதமர் மோடி தனது ட்விட்டர் பக்கத்தில் வாழ்த்து தெரிவித்துள்ளார். இது குறித்து அவர் வெளியிட்டுள்ள பதிவில், “நமது இளம் கிரிக்கெட் வீரர்களின் வெற்றியால் உற்சாகமடைந்தேன். ஜூனியர் உலகக்கோப்பையை வென்றதற்கு எனது வாழ்த்துகள். இந்த வெற்றி அனைத்து இந்தியர்களையும் பெருமைப்பட வைத்துள்ளது” என்று தெரிவித்துள்ளார்.