சச்சினுக்குப் போட்டியாக சதமடித்த பிருத்வி ஷா

மும்பை: துலீப் கோப்பை கிரிக்கெட் தொடரின் இறுதிப்போட்டியில் அறிமுக வீரராகக் களமிறங்கிய இளம் வீரரான பிருத்வி ஷா சதம் அடித்து சாதனை படைத்தார்.

இந்தியா ரெட், இந்தியா ப்ளூ மற்றும் இந்தியா க்ரீன் ஆகிய அணிகளுக்கு இடையிலான துலீப் கோப்பை கிரிக்கெட் தொடரின் இறுதிப்போட்டி நடைபெற்று வருகிறது. பிங்க் பந்துகளுடன் பகல் - இரவு போட்டிகளாக இத்தொடர் நடைபெறுகிறது. நேற்று தொடங்கிய இந்தத் தொடரின் இறுதிப் போட்டியில் இந்தியா ரெட் - இந்தியா ப்ளூ அணிகள் பலப்பரீட்சை நடத்தி வருகின்றன.

இதில், இந்தியா ரெட் டாஸ் வென்று பேட்டிங் தேர்வு செய்தது. அந்த அணியின் பிருத்வி ஷா, ஹெர்வாத்கர் ஆகியோர் தொடக்க வீரர்களாக களம் இறங்கினார்கள். ஹெர்வாத்கர் 25 ரன்கள் எடுத்த நிலையில் ஆட்டம் இழந்தார். அடுத்து வந்த சூர்யகுமார் யாதவ் 8 ரன்னில் வெளியேறினார். 3வது விக்கெடுக்கு ஷா உடன் கேப்டன் தினேஷ் கார்த்திக் ஜோடி சேர்ந்து நிலைத்து நின்று ரன் குவித்தனர்.

அறிமுக வீரராக களம் கண்ட 17 வயதே ஆன பிருத்வி ஷா அபாரமான ஆட்டத்தை வெளிப்படுத்தி சதமடித்தார். அவருக்கு ஒத்துழைப்பு நல்கிய தினேஷ் கார்த்திக்கும் சதம் விளாசினார்.

249 பந்துகளில் 154 ரன்கள் குவித்து ஆட்டமிழந்த பிரித்வி ஷா துலீப் கோப்பை தொடரில் அறிமுகப் போட்டியில் சதம் அடித்த இளம் வீரர் என்ற சாதனையை சச்சின் டெண்டுல்கருடன் பகிர்ந்துகொள்கிறார். ஏற்கனவே, ரஞ்சி டிராபியின் அறிமுகமான போட்டியில் சதம் அடித்து அசத்திய ஷா, தற்போது துலீப் டிராபியின் அறிமுக போட்டியிலும் சதம் அடித்து அசத்தியுள்ளார்.

சச்சின், தீபக் ஹூடா ஆகியோருக்குப் பின் ரஞ்சி மற்றம் துலீப் கோப்பை தொடர்களில் அறிமுகப்போட்டியில் சதம் அடித்த பெருமையை வசமாக்கியுள்ளார். ஜாம்பவான் சச்சின் இரானி கோப்பை தொடரிலும் அறிமுகப் போட்டியில் சதம் அடித்த சாதனையை தன்வசம் வைத்திருப்பது குறிப்பிடத்தக்கது.