இலங்கை தொடர்: க்ருனால் பாண்டியாவுக்கு மாற்று வீரர் யார்? வெளியானது தகவல்!

இலங்கை சுற்றுப் பயணம் மேற்கொண்டுள்ள, ஐபிஎலில் சிறப்பாக சோபித்த இளம் வீரர்களை உள்ளடக்கிய இந்திய அணி, கிரிக்கெட் தொடரில் பங்கேற்று விளையாடி வருகிறது. சமீபத்தில் நடந்து முடிந்த 3 போட்டிகள் கொண்ட ஒருநாள் தொடரை, இந்திய அணி 2-1 என்ற கணக்கில் வென்றது.

தற்போது மூன்று போட்டிகள் கொண்ட டி20 தொடர் நடைபெற்று வருகிறது. முதல் போட்டி ஜூலை 25ஆம் தேதி நடைபெற்றது. இதில் முதலில் களமிறங்கிய இந்திய அணி 164 ரன்கள் அடித்த நிலையில், அடுத்துக் களமிறங்கிய இலங்கை அணி 126 ரன்கள் மட்டும் அடித்து 38 ரன்கள் வித்தியாசத்தில் தோற்றது. இதன்மூலம் மூன்று போட்டிகள் கொண்ட டி20 தொடரில் இந்தியா 1-0 என முன்னிலை வகிக்கிறது. நேற்று, இரண்டாவது டி20 போட்டி நடைபெறும் என அறிவிக்கப்பட்டிருந்தது. அதற்கான, பணிகளும் தீவிரமாக நடைபெற்றுக் கொண்டிருந்தது.

கொரோனா அட்டாக்:

இந்நிலையில், நேற்று மாலை இந்திய அணி வீரர் க்ருனால் பாண்டியாவுக்கு கொரோனா உறுதியாகியானதாக தகவல் வெளியானது. மேலும், மொத்தம் 8 இந்திய வீரர்கள் தனிமை முகாமிற்கு சென்றுள்ளதாகவும் தகவல் வெளியானது. இதனால், இரண்டாவது டி20 போட்டி ஒத்திவைக்கப்படுவதாகவும் அறிவிக்கப்பட்டது. இப்போட்டி இன்று இரவு 8 மணிக்கு துவங்கவுள்ளது.

மாற்று வீரர்:

இப்போட்டியில் க்ருனால் பாண்டியாவுக்கு மாற்று வீரராக களமிறங்கப் போகும் வீரர் குறித்து தற்போது தகவல் வெளியாகியுள்ளது. இவரது இடத்திற்காக இந்திய அணியில் 3 வீரர்கள் காத்திருக்கின்றனர். ஆனாலும், சுழற்பந்து வீச்சாளரான ராகுல் சாகருக்குதான், களமிறங்க அதிக வாய்ப்பு இருப்பதாக கூறப்படுகிறது. இவர், இலங்கைக்கு எதிரான மூன்றாவது ஒருநாள் போட்டியில் சிறப்பாக பந்துவீசி, அனைத்து பேட்ஸ்மேன்களையும் திணறடித்தார். இதனால், சுலபமாக ஜெயிக்க வேண்டிய போட்டியை, இலங்கை கஷ்டப்பட்டு போராடி வென்றது. இதனை மனதில் வைத்து ராகுல் சஹாருக்கு வாய்ப்பு வழங்கப்படும் எனத் தெரிகிறது.

இந்திய அணியின் பேட்டிங் வரிசை வலுவாக இருப்பதால் பந்துவீச்சில் ஒரு நபரை சேர்ப்பதில் எந்த தவறும் இல்லை. இதனால், இன்று க்ருனால் பாண்டியாவுக்கு மாற்றாக ராகுல் சஹார்தான் களமிறங்குவார் என கிரிக்கெட் விமர்சகர்கள் கருதுகிறார்கள்.