‘தல’ தோனி, கபில் தேவ் சாதனையை அசால்ட்டு பண்ண பட்டாகத்தி ஜடேஜா!

நியூசிலாந்து சென்றுள்ள இந்திய கிரிக்கெட் அணி 3 போட்டிகள் கொண்ட ஒருநாள் தொடரில் பங்கேற்கிறது. இதன் முதல் இரண்டு போட்டியிலும் வெற்றி பெற்ற நியூசிலாந்து அணி 2-0 என ஏற்கனவே தொடரை கைப்பற்றி சாதித்தது. இந்நிலையில் இரு அணிகள் மோதும் கடைசி ஒருநாள் போட்டி நாளை மறுநாள் மவுண்ட் மாங்கானியில் நடக்கிறது.

பதிலடி
இந்திய அணிக்கு எதிராக டி -20 தொடரை பறிகொடுத்தற்கு பதிலடியாக ஒருநாள் தொடரை கைப்பற்றி அசத்தியது நியூசிலாந்து அணி. இந்நிலையில் கடைசி ஒருநாள் போட்டியிலும் வெற்றி பெற்று ஒருநாள் தொடரை 3-0 என முழுமையாக கைப்பற்றும் முனைப்பில் நியூசிலாந்து அணி உள்ளது.

ஜடேஜா சாதனை
இதற்கிடையில் இரண்டாவது ஒருநாள் போட்டியில் இந்திய அணி தோல்வியை சந்தித்த போதும் ரவிந்திர ஜடேஜா, சாய்னி ஆகியோர் 9ஆவது விக்கெட்டுக்கு ஜோடி சேர்ந்து 76 ரன்கள் சேர்த்தனர். இதில் ஜடேஜா 73 பந்தில் 55 ரன்கள் அடித்து அசத்தினார். இதன் மூலம் ஒருநாள் கிரிக்கெட்டில் 7ஆவது வீரராக களமிறங்கி அதிக அரைசதம் அடித்த இந்திய வீரர்கள் பட்டியலில் ரவிந்திர ஜடேஜா முதலிட ம் பிடித்தார்.

தோனி, கபில் தேவ்
முன்னதாக முன்னாள் இந்திய கேப்டன்களான கபில் தேவ், தோனி (தலா 6 அரைசதம்) ஆகியோர் 7ஆவது வீரராக களமிறங்கி அதிக அரைசதம் அடித்த இந்திய வீரர்கள் பட்டியலில் முதலிடத்தில் இருந்தனர். இதை ரவிந்திர ஜடேஜா (7 அரைசதம்) முறியடித்தார்.