பழைய பல்லவியே பாடிய மும்பை : மூச்சு திணற திணற அடித்த புனே!

ஐதராபாத்: புனே அணிக்கு எதிரான ஐபிஎல் தொடரின் பைனலில், மீண்டும் மீண்டும் சொதப்பிய மும்பை அணி, 20 ஓவரில் 8 விக்கெட்டுக்கு 129 ரன்கள் எடுத்தது.

இந்தியாவில் 10வது ஐபிஎல் கிரிக்கெட் தொடர் இன்றுடன் முடிவிக்கு வருகிறது. இதில் ’பிளே ஆப் சுற்றுகளுக்கு தகுதி பெற்ற ஐதராபாத், கொல்கத்தா அணிகளை விரட்டியடித்த மும்பை, புனே அணிகள் பைனலுக்கு முன்னேறின.

ஆரம்பமே சொதப்பல்:
இதில் ‘டாஸ்’ வென்ற அணி மும்பை அணி கேப்டன் ரோகித் சர்மா முதலில் ‘பேட்டிங்’ தேர்வு செய்தார். இதையடுத்து களமிறங்கிய மும்பை அணிக்கு, பார்த்தீவ் படேல் (4), சிம்மன்ஸ் (3) மகா மட்டமான துவக்கம் அளித்தனர்.

ரோகித் அவசரம்:
பின் வந்த ராயுடு (12) ஸ்மித்தின் சூப்பர் பீல்டிங்கில் ரன் அவுட்டானார். தொடர்ந்து விக்கெட்டுகளை பறிகொடுத்த பதட்டத்தில் அவசர அவசரமாக ரன்கள் சேர்த்த கேப்டன் ரோகித் சர்மா (24) நீண்ட நேரம் தாக்குபிடிக்க தவறினார்.

பறந்த போலார்டு:
அடுத்து வந்த போலார்டு வந்த வேகத்தில் பறக்க, 7 ரன்களுக்கு அவுட்டானார். ஹர்திக் பாண்டியா (10) நிலைக்கவில்லை. பின் வந்த கரண் சர்மா (1) சொதப்பலாக அவுட்டானார். எதிர்முனையில் குர்னால் பாண்டியா முக்கி முக்கி மும்பை அணியை கரையேற்ற, மும்பை அணி, 20 ஓவரில் 8 விக்கெட்டுக்கு 129 ரன்கள் எடுத்தது.

புனே அணி சார்பில் உனத்கத், ஜம்பா, கிறிஸ்டியன் அதிகபட்சமாக 2 விக்கெட் கைப்பற்றினர்.

இதுவே மோசம்:
புனே அணிக்கு எதிராக ரன்கள் சேர்த்த மும்பை அணி, ஐபிஎல் வரலாற்றில் பைனலில் மகா மட்டமான ஸ்கோரை பதிவு செய்தது. இதற்கு முன் கடந்த 2009ல் நடந்த பைனலில் பெங்களூரு அணிக்கு எதிராக டெக்கான் அணி 143 ரன்கள் எடுத்ததே குறைவான ஸ்கோராகும். ஆனால் அந்த போட்டியில் டெக்கான் அணி 6 ரன்கள் வித்தியாசத்தில் வெற்றி பெற்றது.