ஆஸி தொடரின் இந்திய ஹீரோ இவர்தான்: சச்சின் கணிப்பு!

இந்திய-ஆஸ்திரேலிய தொடரில் மூன்றுவகை தொடர்களிலும் இடம்பெற்றுள்ள மயங்க் அகர்வால் சிறப்பான ஆட்டத்தை வெளிப்படுத்தி கிரிக்கெட் உலகில் தனக்கென நிரந்தர இடத்தை பிடிக்க வாய்ப்புள்ளது என முன்னாள் வீரர் சச்சின் டெண்டுல்கர் தெரிவித்துள்ளார்.

மயங்க், நடந்து முடிந்த ஐபிஎல் தொடரில் அதிரடியாக விளையாடி ரன்குவிப்பில் ஈடுபட்டவர். கிங்ஸ் லெவன் பஞ்சாப் அணியின் துவக்க வீரராகக் களமிறங்கி 11 போட்டிகளில் 156.45 ஸ்ட்ரைக் ரேட்டுடன் 424 ரன்கள் குவித்து அசத்தி இந்திய அணி தேர்வாளர்களின் குட்புக்கில் இடம்பிடித்து, ஆஸ்திரேலியாவுக்கு சென்றுள்ளார்.

இவர் குறித்து தனியார் பத்திரிகை ஒன்றுக்குப் பேட்டியளித்த சச்சின், ஒருநாள், டி20 போட்டிகளில் துவக்க வீரர்களுக்கான இடத்திற்கு ராகுல், ஷுப்மன் கில் போன்றவர்களுடன் போட்டிபோட வேண்டிய நிலை இருக்கும். ஆனால், டெஸ்ட் போட்டிகளில் மயங்க் ஓபனராக களமிறங்கத் தடையிருக்காது எனத் தெரிவித்தார்.

இந்தியா vs ஆஸ்திரேலியா: சிறந்த டாப் 5 ஆட்டங்கள்!

“மயங்க் சிறந்த வீரர் என்பதில் எவ்வித சந்தேகம் இல்லை. ஐபிஎல் தொடரில் அவரின் ஆட்டத்தை அனைவரும் பார்த்திருப்போம். ஆஸ்திரேலிய தொடரிலும் அதே ஆட்டத்தைப் பார்ப்போம் என நம்புகிறேன். ஒருநாள், டி20 தொடர்களில் துவக்க வீரர்களுக்கான இடத்திற்குப் பலத்த போட்டி நிலவுகிறது. ஆனால், டெஸ்ட் போட்டிகளில் மயங்க்தான் ஓபனர். அதில் எவ்வித சந்தேகமும் இல்லை. ஆஸ்திரேலிய தொடர் முடிந்ததும் மயங்க் அனைவரின் கண்களுக்கும் ஹீரோவாக தெரிவார். அந்த அளவிற்கு அவரின் ஆட்டம் இருக்கும்” என சச்சின் நம்பிக்கை தெரிவித்தார்.

ஆஸ்திரேலிய அணியின் பேட்டிங் வரிசை பலமிக்கதாக உள்ளதாகவும் தெரிவித்தார். “ஸ்டீவன் ஸ்மித், டேவிட் வார்னர், மார்னஸ் லபுஷேன் இவர்களைக் குறைத்து மதிப்பிடக் கூடாது. இந்திய அணி வெற்றியைத் தடுக்க இந்த மூன்றுபேர் போதும். அதனால், இவர்களை விரைவில் வீழ்த்த இந்திய அணி கடுமையாக முயற்சிக்க வேண்டும்” எனக் கூறினார்.

இரண்டு டெஸ்ட் போட்டிகளில் ரோஹித், இஷாந்த் நீக்கம்!

விராட் கோலி நான்கு டெஸ்ட் போட்டிகள் கொண்ட தொடரின் முதல் போட்டி முடிந்தவுடன், தனது மனைவியின் பிரசவத்திற்காக நாடு திரும்புகிறார். இதுகுறித்தும் சச்சின் பேசினார். விராட் கோலி இல்லாதது பெரும் இழப்புதான். மற்ற மூன்று டெஸ்ட் போட்டிகளில் ஒரு இளம் வீரருக்கு வாய்ப்பு கிடைப்பது உறுதியாகியுள்ளது. அதை அந்த இளம் வீரர் சரியாகப் பயன்படுத்திக்கொண்டால் நல்லது” எனத் தெரிவித்தார்.

முதல் ஒருநாள் போட்டி நவம்பர் 27, முதல் டி20 போட்டி டிசம்பர் 4, முதல் டெஸ்ட் டிசம்பர் 17 ஆகிய தேதிகளில் துவங்க உள்ளது. மயங்க் அகர்வால் மூன்றுவகைத் தொடர்களிலும் இடம்பெற்றுள்ளது குறிப்பிடத்தக்கது.