இந்தியா – இலங்கை கிரிக்கெட்: விஜய்க்கு சோகம், தவானுக்கு யோகம்!

இலங்கை சுற்றுப்பயணம் மேற்கொள்ளும் இந்திய கிரிக்கெட் அணியிலிருந்து தமிழக வீரர் முரளி விஜய் விலக, அவரது இடத்தை ஷிகர் தவான் பிடித்துள்ளார்.

இந்திய கிரிக்கெட் அணி இலங்கைக்கு சுற்றுப்பயணம் மேற்கொண்டு 3 டெஸ்ட், 5 ஒரு நாள் போட்டி மற்றும் ஒரு 20 ஓவர் போட்டியில் விளையாடுகிறது. இரு நாட்டு அணிகள் மோதும் டெஸ்ட் தொடர் முதலில் நடக்கிறது. தொடரின் முதல் போட்டி காலேயில் வரும் ஜூலை 26 முதல் தொடங்குகிறது.

இந்த டெஸ்ட் தொடருக்காக விராட் கோலி தலைமையிலான இந்திய அணி அண்மையில் அறிவிக்கப்பட்டது. இதனிடையே, தொடக்க ஆட்டக்காரர் முரளி விஜய் காயம் காரணமாக தொடரிலிருந்தே விலகியிருக்கிறார். ஆஸ்திரேலியாவுக்கு எதிரான ஒருநாள் தொடரில் மணிக்கட்டில் ஏற்பட்ட காயம் இன்னும் குணமாகவில்லை. எனவே, அவர் தொடர்ந்து சிகிச்சை பெற இருக்கிறார்.
முரளி விஜய்க்கு பதிலாக சமீப காலமாக ஒருநாள் போட்டிகளில் கலக்கி வரும் ஷிகர் தவான் டெஸ்ட் அணியில் மீண்டும் சீட்டைப் பிடித்திருக்கிறார். வெஸ்ட் இண்டீஸ் அணிக்கு எதிரான தொடரில் சிறப்பான ஆட்டத்தை வெளிப்படுத்தி அவர் டெஸ்டிலும் மறுபிரவேசம் செய்யவுள்ளார்.



இந்திய அணி வீரர்கள் விவரம்: விராட் கோலி (கேப்டன்), ஷிகர் தவான், லோகேஷ் ராகுல், புஜாரா, ரஹானே (துணை கேப்டன்), ரோகித் சர்மா, அஸ்வின், ரவீந்திர ஜடேஜா, விருத்திமான் சஹா, இஷாந்த் ஷர்மா, உமேஷ் யாதவ், ஹர்திக் பாண்ட்யா, புவனேஷ்வர்குமார், முகமது ஷமி, குல்தீப் யாதவ், அபினவ் முகுந்த்.