SL vs AUS: ‘கடைசி பந்துவரை திக் திக்’…ஆஸிக்கு எதிராக வரலாறு படைத்தது இலங்கை அணி…வரலாற்று வெற்றி!

இலங்கை சென்றுள்ள ஆஸ்திரேலிய அணி 5 போட்டிகள் கொண்ட ஒருநாள் தொடரில் பங்கேற்று விளையாடி வருகிறது.

இதில் முதல் 3 போட்டிகள் நடந்து முடிந்து இலங்கை அணி 2-1 என்ற கணக்கில் முன்னிலையில் இருந்தபோது, நான்காவது போட்டி துவங்கி நடைபெற்றது. டாஸ் வென்ற ஆஸ்திரேலிய அணி முதலில் பந்துவீச்சைத் தேர்வு செய்தது.

இலங்கை இன்னிங்ஸ்:

முதலில் களமிறங்கிய இலங்கை அணியில் டாப் ஆர்டர் பேட்டர்கள் சிறப்பாக செயல்படவில்லை. டிக்வெல்லா (1), பதும் நிஷங்கா (13), குஷல் மெண்டீஸ் (14) ஆகியோர் அடுத்தடுத்து ஆட்டமிழந்து ஷாக் கொடுத்தனர்.

பார்ட்னர்ஷிப்:

அடுத்து தனஞ்ஜெயா டி சில்வா, அசலங்கா ஆகியோர் பெரிய பார்ட்னர்ஷிப் அமைத்தனர். இந்த பார்ட்னர்ஷிப் 100 ரன்களை கடந்து நீடித்தது. இறுதியில் சில்வா 60 (61), அசலங்கா 110 (106) ஆகியோர் ஆட்டமிழந்தனர். தொடர்ந்து ஹசரங்கா 20 பந்துகளில் 21 ரன்களை சேர்த்தார்.

இதனால், இலங்கை அணி 49 ஓவர்களில் 258/10 ரன்களை சேர்த்தது.

ஆஸி இன்னிங்ஸ்:

எளிய இலக்கை துரத்திக் களமிறங்கிய ஆஸ்திரேலிய அணியில் டேவிட் வார்னர் மட்டுமே நிலைத்து நின்று விளையாடினார். இவர் 99 ரன்கள் எடுத்திருந்தபோது, சில்வா பந்துவீச்சில் ஸ்டெம்பிட் ஆகி நடையைக் கட்டினார். மற்றவர்களில் பாட் கம்மின்ஸ் (35) மட்டுமே 30+ ரன்களை அடித்தார்.

பிஞ்ச் (0), லபுஷேன் (14), அலேக்ஸ் ஹேரி (19), டிராவிஸ் ஹெட் (27), மேக்ஸ்வெல் (1) போன்றவர்கள் சிறப்பாக செயல்படவில்லை.

கடைசி பந்து ட்விஸ்ட்:

இறுதியில் கடைசி ஓவருக்கு 19 ரன்கள் தேவைப்பட்டது. அப்போது ஷனகா பந்துவீச்சில் குக்னிமேன் 3 பவுண்டரிகளை அடித்து அசத்தினார். அடுத்து கடைசி பந்தில் 5 ரன்கள் தேவைப்பட்டது. அப்போது வேகம் குறைந்த பந்தை குக்னிமேன் பந்தை தூக்கியடித்த நிலையில், அதனை அசலங்கா கேட்ச் பிடித்து அசத்தினார். இதனால், ஆஸ்திரேலிய அணி வெறும் 4 ரன்கள் வித்தியாசத்தில் தோற்றது.

இந்த வெற்றியின் மூலம், இலங்கை அணி 3-1 என்ற கணக்கில் ஒருநாள் தொடரை கைப்பற்றியுள்ளது. ஆஸ்திரேலிய அணியை, இலங்கை அணி தனது சொந்த மண்ணில் வீழ்த்துவது இதேமுதல் முறை.

கடைசிப் போட்டி நாளை மறுநாள் நடைபெறவுள்ளது. இதனைத் தொடர்ந்து இரு அணிகளுக்கும் இடையிலான 2 போட்டிகள் கொண்ட டெஸ்ட் தொடர் ஜூன் 29ஆம் தேதி துவங்கி நடைபெறும் என்பது குறிப்பிடத்தக்கது.