Rohit Sharma: தாறுமாறா துவைத்து தொங்கவிட்ட ‘டான்’ ரோஹித்....: தொடரை சமன் செய்த இந்திய அணி!

இந்தியா வந்துள்ள வங்கதேச அணி, 3 டி-20 போட்டிகள் கொண்ட தொடரில் பங்கேற்கிறது. இதன் முதல் போட்டியில் வெற்றி பெற்ற வங்கதேச அணி தொடரில் 1-0 என முன்னிலை பெற்றது. இரு அணிகள் மோதும் இரண்டாவது டி-20 போட்டி, ராஜ்கோட்டில் இன்று நடந்தது.

இரண்டாவது டி-20 போட்டியில், டாஸ் வென்ற இந்திய அணி கேப்டன் ரோஹித் ஷர்மா, முதலில் பவுலிங் தேர்வு செய்தார். இரு அணிகளிலும் மாற்றம் செய்யப்படவில்லை.

இதையடுத்து களமிறங்கிய வங்கதேச அணிக்கு லிடன் தாஸ் (29), நையீம் (36) சவுமியா சர்கார் (30) ஆகியோர் கைகொடுக்க, வங்கதேச அணி 20 ஓவரில் 6 விக்கெட்டுக்கு 153 ரன்கள் எடுத்தது.

ரோஹித் அதிரடி:
எட்டக்கூடிய இலக்கை துரத்திய இந்திய அணிக்கு தவன், ரோஹித் ஷர்மா ஜோடி அதிரடி துவக்கம் அளித்தனர். வங்கதேச பந்துவீச்சை நாலாபுறமும் சிதறடித்த ரோஹித் ஷர்மா, அரைசதம் கடந்தார்.

தொடர்ந்து அதிரடி காட்டிய, ரோஹித் ஷர்மா, சிக்சர் மழை பொழிந்தார். இவருக்கு நல்ல கம்பெனி கொடுத்த தவன் 31 ரன்னில் அவுட்டானார். அடுத்து வந்த ராகுல் கைகொடுக்க, அதிரடியை தொடர்ந்த ரோஹித் ஷர்மா, 85 ரன்கள் (6 பவுண்டரி, 6 சிக்சர்கள்) எடுத்து அவுட்டானார்.

இதையடுத்து இந்திய அணி, 15.4 ஓவரில் 2 விக்கெட்டுக்கு 154 ரன்கள் எடுத்து 8 விக்கெட் வித்தியாசத்தில் வெற்றி பெற்றது. இதன் மூலம் 3 போட்டிகள் கொண்ட டி-20 தொடரை இந்திய அணி, 1-1 என சமன் செய்தது. இரு அணிகள் மோதும் கடைசி டி-20 போட்டி, வரும் 10ம் தேதி, நாக்பூரில் நடக்கிறது. இதில் வெல்லும் அணி டி-20 தொடரை கைப்பற்றும்.


அசத்தல் ஜோடி...
இப்போட்டியில் முதல் விக்கெட்டுக்கு 118 ரன்கள் சேர்த்த ரோஹித் ஷர்மா, தவன் ஜோடி, டி-20 அரங்கில் அதிக முறை 100 ரன்களுக்கு மேல் சேர்த்த ஜோடிகள் பட்டியலில் நம்பர்-1 இடத்துக்கு முன்னேறியது.

டி-20 அரங்கில் அதிக முறை 100 ரன்களுக்கு மேல் சேர்த்த ஜோடி
4 ரோஹித் ஷர்மா - தவன் * (இந்தியா)
3 வார்னர் - வாட்சன் (ஆஸி.,)
3 கப்டில்- வில்லியம்சன் (நியூசி.,)
3 ரோஹித் ஷர்மா - விராட் கோலி (இந்தியா)
3 கப்டில் - முன்ரோ (நியூசி.,)